Ալեքսանդր Լիտվինենկոյի մարմնի դիահերձումն Արեւմուտքում անցկացված նման գործողություններից ամենավտանգավորն է եղել: Ռուսական հատուկ ծառայությունների նախկին աշխատակցի մահվան գործով Լոնդոնում կայացած բաց դատալսման ժամանակ այս մասին հայտարարել է պաթոլոգանատոմների թիմի ղեկավարը:
Դատաբժշկական փորձագետ Նաթանիել Քերրին նշել է, որ դիահերձման ժամանակ մասնագետները հատուկ պաշտպանիչ կոստյումներ եւ սաղավարտներ են հագել: Բժիշկների խումբ է հերթապահել՝ անհրաժեշտության դեպքում հենց մասնագետներին օգնություն ցուցաբերելու համար:
Վտանգ է ներկայացրել ալֆա-ճառագայթումը: Իսկ գամմա-ճառագայթների հետքեր չեն հայտնաբերվել, չնայած Լիտվինենկոյի արյունից անհետացել են սպիտակ մարմինները, ինչն ակնհայտորեն մատնանշել է ճառագայթային հիվանդություն: Արդյունքում փորձագետները պարզել են, որ տղամարդուն փորձել են պոլոնիումով թունավորել առնվազն երկու անգամ:
«Ամերիկայի ձայն»-ի փոխանցմամբ, հետաքննության ընթացքում պարզվել է, որ Ալեքսանդր Լիտվինենկոն բրիտանական ոստիկանությանը հայտնել է, որ իր թունավորման հետեւում կանգնած է անձամբ Ռուսաստանի նախագահ Վլադիմիր Պուտինը:
«Ես ոչ մի կասկած չունեմ, որ դա իրականացրել են ռուսական հատուկ ծառայությունները,- այն ժամանակ հայտարարել էր Լիտվինենկոն:- Իմանալով համակարգը՝ ես վստահ եմ, որ այլ երկրի քաղաքացու դեմ հենց այդ երկրի տարածքում նման բան անելու հրաման կարող էր արձակել միայն մեկ մարդ, հատկապես եթե դա վերաբերում է Մեծ Բրիտանիային: Դա Ռուսաստանի Դաշնության նախագահ Վլադիմիր Պուտինն է»:
Ալեքսանդր Լիտվինենկոն մահացել է Լոնդոնում, 2006 թվականի նոյեմբերին: Տեղական ոստիկանությունում հիշեցնում են, որ նրա մահվան պատճառների հետաքննությունը մինչեւ հիմա շարունակվում է: Երկու կասկածյալներ՝ Անդրեյ Լուգովոյն ու Դմիտրի Կովտունը, հետախուզման մեջ են:
