Ուկրաինայում Ռուսաստանի ներկայիս քաղաքականությունը սպառնալիք է ինչպես տարածաշրջանի, այնպես էլ ամբողջ աշխարհի համար, հայտարարել է Վրաստանի նախկին վարչապետ Բիձինա Իվանիշվիլին: Նա նաեւ նախկին նախագահ Միխայիլ Սահակաշվիլիին եւ նրա կողմնակիցներին, որոնք վրացիներին կոչ են անում կռվել Ուկրաինայում, առաջարկել է այնտեղ ուղարկել սեփական որդիներին: Ըստ նրա՝ Ուկրաինային Վրաստանի կողմից օգնությունը պետք է ցուցաբերվի պաշտոնական մակարդակով:
«Սահակաշվիլին վրացիներին Ուկրաինա է կանչում, թող նա եւ նրա պես վարվող մյուս մարդիկ սկսեն իրենց երեխաներից», - «Իմեդի» հեռուստաալիքի հետ զրույցում ասել է Իվանիշվիիշին:
Նա նշել է, որ եթե «բարեկամ» Ուկրաինան պաշտոն է տալիս հետախուզման տակ գտնվող վրացիներին, դրանում «ոչ մի վատ բան չկա»: Սական եթե մարդիկ «խայտառակվել» են Վրաստանում, նույն սխալները կարող են գործել Ուկրաինայում:
Վրաստանի նախկին վարչապետը նաեւ նշել է, որ նախկին նախագահի «Միացյալ ազգային շարժում» կուսակցությունը ցանկանում է ապակայունացնել Վրաստանը, բայց չի կարող, քանի որ ոչ մի ռեսուրս չունի, նրա խոսքերն է փոխանցում «Նովոստի-Գռուզիան»:
Ըստ գործակալության՝ Ուկրաինայում արդեն Վրաստանի երկու քաղաքացի է զոհվել: Կիեւի պաշտոնական իշխանությունների կողմում՝ «Վրացական լեգեոնի» կազմում, մի քանի տասնյակ Վրաստանի քաղաքացիներ են կռվում: Ուկրաինան առողջապահության նախարար է նշանակել Վրաստանի նախկին առողջապահության նախարար Ալեքսանդր Քվիտաշվիլիին, ՆԳՆ-ում եւ արդարադատության նախարարությունում առաջին տեղակալների պաշտոնները եւս զբաղեցրել են վրացիները: