Երեւան քաղաքում տեղակայված N ուսումնական զորամասի մարզահրապարակում այսօր՝ հունվարի 29-ին, կախված վիճակում հայտնաբերված զինծառայող Հայկազ Բարսեղյանն Արարատի մարզի Նիզամի գյուղից էր, կուրսանտ:
Համայնքի ղեկավար Հարութին Կարապետյանը NEWS.am-ի հետ զրույցում նշեց, որ Հայկազն ավարտել էր Մոնթե Մելքոնյանի անվան ռազմամարզական վարժարան, այնուհետեւ ընդունվել ուսումնական զորամաս:
«Շուտով 20 տարեկան կդառնար, շատ խելոք տղա էր, էսքան ժամանակ ոչ մի տեսակի բողոք, դժգոհություն չենք լսել: Հայկազը ոչ մի անախորժություն չի ունեցել»,- ասաց նա:
Գյուղապետը նշեց, որ Հայկազը տան ավագ որդին էր, իրենից փոքր երկու եղբայր ուներ:
Ավելի վաղ հայտնել էինք, որ հունվարի 29-ին, ժամը 06:35-ի սահմաններում Երեւան քաղաքում տեղակայված N ուսումնական զորամասի մարզահրապարակում հայտնաբերվել է նույն զորամասի զինծառայող, Հայկազ Արկադիի Բարսեղյանը՝ պտտաձողի վրա պարանով կախված վիճակում: ՊՆ մամուլի ծառայությունից հայտնում են, որ դեպքի առթիվ կատարվում է նախնական քննություն: