Նիդեռլանդական Հիլվերսում քաղաքում ատրճանակով զինված անձը ներխուժել է ազգային NOS հեռուստաընկերության գրասենյակ՝ եթեր մտնելու հնարավորություն պահանջելով:
Սեւ կոստյումով, փողկապով տղամարդը ստուդիա է մտել հունվարի 29-ի երեկոյան՝ ատրճանակով սպառնալով հսկչին: Նա հայտարարել է, որ ցանկանում է «համաշխարհային նշանակության տեղեկություն» հայտնել: «Մեզ վարձել էին հետախուզական ծառայությունները»,- ասել է զինված հյուրը:
Հեռուստաեթերի կադրերում կարելի էր տեսնել մարդու, ով ստուդիայում քայլում է սեւ ատրճանակը հետեւում պահած՝ ոստիկանության ներխուժումից քիչ առաջ: Նրան ձեռնաշղթաներ են հագցրել եւ տարել: Ավելի ուշ պարզվել է, որ ատրճանակը իսկական չէր:
NOS-ի հեռարձակումն ընդհատվել էր, քանի որ աշխատակիցներին դուրս էին բերել ստուդիայից, հայտնում է Lenta.ru-ն՝ վկայակոչելով Reuters-ը:
ՏԱՍՍ-ը հայտնում է, որ գիշերը NOS-ը վերսկսել է հեռարձակումը, ընդ որում՝ Հաագայի բաժանմունքից:
«ՌԻԱ Նովոստին» գրում է, որ տղամարդը հայտնել է «հաքերների կոլեկտիվին» պատկանելու մասին:
«Տեղեկությունները, որոնք պատրաստվում եմ հայտնել, համաշխարհային նշանակություն ունեն: Մեզ վարձել էին հետախուզական ծառայությունները, եւ իմացանք բաներ, որոնք կասկածի տակ են դնում ժամանակակից հասարակությունը: Այժմ մենք դրանք կբացահայտենք», - հայտարարել է նա:
Տեղի մամուլի տվյալներով՝ ձերբակալվածը Փեյնաքերի տեխնիկական ինստիտուտի 19-ամյա ուսանող է: Հաղորդվում է, որ նա վերջերս կորցրել է ծնողներին, ինչից հետո անհավասարակշիռ վիճակում է: