2014 թվականին ԼՂՀ-ում գրանցվել է զբոսաշրջիկների քանակի 12 տոկոս նվազում նախորդ տարվա համեմատ, սակայն միեւնույն ժամանակ աճել է օտարերկրյա զբոսաշրջիկների գիշերակացի տեւողությունը, ինչպես նաեւ Հայաստանի Հանրապետությունից այցելուների քանակը: Այս մասին հունվարի 30-ին կայացած ամփոփիչ ասուլիսում հայտարարեց ԼՂՀ ԿԱ զբոսաշրջության եւ պատմական միջավայրի պահպանության վարչության պետ Սերգեյ Շահվերդյանը:
Նա նշեց, որ զբոսաշրջությունը, լինելով ԼՂՀ տնտեսության գերակա ճյուղ, այս տարի եւս ներմուծվող տարադրամի խոշոր աղբյուր է հանդիսացել. 2014 թվականին օտարերկրյա զբոսաշրջիկները 6,4 միլիոն ԱՄՆ դոլարի համարժեք գումար են ծախսել Արցախում: «Տարին հագեցած էր նաեւ միջազգային տարբեր հարթակներում ԼՂՀ զբոսաշրջային ներուժի հանրահռչակմամբ: Այսպես, 2014 թվականին ԼՂՀ-ն մասնակցել է 4 միջազգային խոշորագույն զբոսաշրջային ցուցահանդեսներին` Մադրիդում, Փարիզում, Ռիմինիում եւ Լոնդոնում: Նշված ցուցահանդեսներում մասնակիցների եւ այցելուների թիվը կազմում է համապատասխանաբար` 17,696 ընկերություն եւ 290,000 մարդ: Չնայած Ադրբեջանի կողմից հարուցված խոչընդոտների, ԼՂՀ պատվիրակությունը մինչեւ վերջ մասնակցել է նշված ցուցահանդեսներին եւ իրականացրել հաջող քարոզչական աշխատանքներ»,-ասաց Սերգեյ Շահվերդյանը: Տարվա ձեռքբերումներից կարելի է նշել նաեւ Հադրութի շրջանի Տող գյուղում հաջողությամբ կայացած Արցախյան գինու առաջին փառատոնը: Վարչության պետը կարեւորել է հատկապես պատասխանատու զբոսաշրջության զարգացումը, որի հիմքում ընկած է նաեւ պատմամշակութային հուշարձանների պահպանության ոլորտը: Հնագիտական պեղումների ընթացքում Տիգրանակերտում հայտնաբերվել են բացառիկ նշանակություն ունեցող վաղմիջնադարյան դամբարան, իսկ Ամարասում՝ Սուրբ Գրիգորիսի դամբարանի արեւելյան մուտքը, որոնք վկայում են տարածաշրջանում վաղ քրիստոնեական-հայկական մշակույթի առկայության մասին:
Պատմամշակութային հուշարձանների վերականգնման ոլորտում իրականացվել եւ ավարտին են հասցվել «Տողի Մելիքական ապարանք» պետական պատմամշակութային արգելոցի պատմական տարածքի պարսպապատման եւ մասնակի բարեկարգման, ինչպես նաեւ Սարուշեն գյուղի Փիրումաշեն եկեղեցու վերականգնման աշխատանքները: Դադիվանքի կաթողիկե եկեղեցու հարավային պատի բացառիկ որմնանկարը վերականգնվել է վարչության եւ իտալացի մասնագետների համագործակցության շնորհիվ: Ավարտելով խոսքը` Սերգեյ Շահվերդյանը նշել է, որ 2015 թվականին վարչության առաջնահերթ խնդիր է հանդիսանալու Արցախում պատասխանատու զբոսաշրջության եւ պատմական ժառանգության պահպանության զարգացումը: