Ղարաբաղյան հակամարտության կարգավորման հարցում Հայաստանը պետք է մերժի որեւէ զիջման գնալու միտքը։ Հուլիսի 15-ին լրագրողների հետ հանդիպման ժամանակ այս մասին հայտարարեց Ժողովրդական կուսակցության նախագահ Տիգրան Կարապետյանը։ Նրա խոսով, այդ ուղղությամբ ցանկացած քայլ կբերի հակառակորդի կողմից ավելի մեծ պահանջների։

«Եթե սահմանը փակեցին այն բանից հետո, երբ մենք վերցրեցինք Քելբաջարը, ինչո՞ւ այժմ թշնամին սահմանը պետք է բացի այլ պայմաններով։ Եթե Հայաստանը թուլանա, կնստեն նրա ուսերին»,- հայտարարեց Կարապետյանը՝ ավելացնելով, որ ինքը եւ իր կուսակցությունը միշտ էլ դեմ են եղել ցյուրիխյան արձանագրություններին։

«Հայաստանի արտգործնախարարը, որի մասին պրոֆեսիանալ առումով շատ ցածր կարծիք ունեմ, չկարողացավ ապացուցել դա»,- նկատեց քաղաքական գործիչը։

«Ձեզ ինչ է թվում, ինչո՞ւ են այդ անհաջող ծնունդ Սահակաշվիլիին մեդալներ տալիս։ Որովհետեւ նրա տարածքով ապրանք է անցնում։ Մեր տարածքով առանձնապես ոչինչ  չի անցնում, դրա համար էլ մեր միակ ելքը միասնականությունն է։ Մի վախեցե՜ք...։  Եթե ՆԱՏՕ-ի խաղաղարար զորքերը զբաղեցնեն ազատագրված տարածքների անգամ մի փոքր հատված, Իրանը կդառնա մեր թշնամին։ Իսկ դուք դրանից չե՞ք վախենում»,- զայրացավ Կարապետյանը։

«Չի կարելի գնալ որեւէ զիջման, դա անթույլատրելի է եւ կբերի երկրի,ազգի, հայկական գենի կորստի։ Երբ 4 չեչեններ իրենց ձեռքն են վերցնում դանակները եւ կանգնում մեջքմեջքի, 100 ռուսներ վախենում են նրանցից։ Մենք պետք է վարվենք նույն կերպ»,- ամփոփեց Տիգրան Կարապետյանը։