Փոքր եւ միջին բիզնեսի ներկայացուցիչների համար հարկը պետք է փոխարինել ֆիքսված վճարով: Այդ մասին այսօր՝ հունվարի 31-ին, լրագրողներին հայտարարել է Հայրենական ապրանք արտադրողների միության նախագահ Վազգեն Սաֆարյանը: Նրա կարծիքով, դա կպարզեցնի հաշվապահական հաշվառումը, որը փոքր բիզնեսի համար բավականին ծախսատար է: Իսկ գլխավորը նրանց կազատի գործարքների փաստաթղթավորման հետ կապված դժվարություններից, որոնցից բողոքում են առեւտրականները:
Եթե ֆիննախը չի ցանկանում կորցնել բյուջետային հատկացումները, ապա նա կարող է որպես հիմք վերցնել Փոքր եւ բիջին բիզնեսից գանձվող ընթացիկ վճարները (տարեկան 20-22 մլրդ դրամ), եւ դրանք բաժանել գործող առեւտրային տաղավարների մետրաժին, այսինքն հարկը եթե անգամ ցածր էլ չլինի, գոնե հեշտ կլինի: «Յուրաքանչյուրը կվճարի՝ ըստ տաղավարի մակերեսի եւ կմոռանա փաստաթղթաշրջանառության եւ հարկային ստուգումների մասին: Ահա թե ինչ ենք մենք առաջարկում», - նշել է Սաֆարյանը:
Նշենք, որ երեկ կառավարության շենքի մոտ փոքր եւ միջին առեւտրային տաղավարների աշխատակիցները բողոքի ակցիա են անցկացրել՝ ընդդեմ հոկտեմբերի 1-ին ուժի մեջ մտած շահութահարկի նոր ռեժիմի անցման: Հարկի տոկոսադրույքը 3,5-ից նվազել է մինչեւ 1%, սակայն ավելի խիստ են պահանջում հաշիվ- ապրանքագրերը: Առեւտրականների խոսքով՝ խոշոր մատարարները հաճախ հրաժարվում են դրանք տրամադրել: