Ներկայիս հարկային քաղաքականությունը առճակատման է տանում փոքր եւ խոշոր բիզնեսին։ Այս մասին հունվարի 31-ին լրագրողներին հայտնել է Հայաստանի հայրենական ապրանք արտադրողների միության նախագահ  Վազգեն Սաֆարյանը։

Նա նշել է, որ փոքր եւ միջին առեւտրականներին բոլոր գործարքների հաշիվ-ապրանքագրեր ներկայացնելու վերաբերյալ պահանջը նշանակում է, որ ՓՄՁ-ն պետք է իր հերթին դրանք պահանջի իր խոշոր մատակարարներից: Սակայն կախվածություն ունեցողի համար դժվար է պահանջելը, հավելել է Սաֆարյանը: Գաղտնիք չէ, որ ՓՄՁ շատ սուբյեկտներ չեն կարող կանխավճարով աշխատել, վճարում են միայն վաճառքից հետո: «Բնականաբար, այս պայմաններում նրանք չեն ցանկանա փչացնել հարաբերությունները եւ ապրանքագրեր պահանջել՝ իմանալով, որ խոշոր բիզնեսը ապրաքանգրեր տալ չի սիրում», - հավելել է Սաֆարյանը:

Նշենք, որ երեկ կառավարության շենքի մոտ մանր եւ միջին առեւտրականները բողոքի ցույց են անցկացրել շրջանառության հարկի մասին նոր օրենքի դեմ, որն ուժի մեջ է մտել հոկտեմբերի 1-ից: Ըստ օրենքի՝ հարկային դրույքը  3,5-ից իջեցվել է 1%-ի, բայց հաշիվ-ապրանքագրերի հանդեպ պահանջները խստացվել են։ Ըստ առեւտրականների՝ բարդությունն այն է, որ խոշոր մատակարարները հաճախ հրաժարվում են  դրանք տրամադրելուց։