400 տարվա պատմության ընդմիջումից հետո 2015թ. ապրիլի 23-ին առաջին անգամ տեղի է ունենալու Ցեղասպանության նահատակների սրբադասման կարգը: Այս մասին այսօր` փետրվարի 3-ին, լրագրողների հետ հանդիպմանն ասաց Մայր Աթոռ Սուրբ Էջմիածնի Եկեղեցական հայեցակարգային հարցերի գրասենյակի տնօրեն Տ. Բագրատ եպիսկոպոս Գալստանյանը` նշելով, որ սրբադասման համար չորս պայման է անհրաժեշտ:
«Նահատակությունը հավատքի ու հայրենիքի համար, սրբակյացությունը՝ սրբակենցաղ կյանքը, հրաշքների առկայությունը կենդանության օրոք կամ մահվան ժամանակ, հավատքի քարոզչությունը, տարածումը: Ծիսակարգում պետք է տեղի ունենա նաեւ նկարների օծումը, մասունքների հանդեպ խոնարհումը, որոնք հատուկ մասունքարանի մեջ պետք է դրվեն: Այս առիթով դեռ 25 տարի առաջ գրվել է հատուկ շարական»,-ասաց Տ. Բագրատ եպիսկոպոս Գալստանյանը` ավելացնելով, որ այս սրբադասումը ունի հավաքական նահատակության գաղափար:
Տ. Բագրատ եպիսկոպոս Գալստանյանի խոսքով`պլանավորվում է սրբադասման հանձնախբի աշխատանքները շարունակել հինգ ուղղությամբ:
«Առաջինը Կոմիտաս Վարդապետի սրբադասման հնարավորությունն է քննվելու, երկրորդը` մինչեւ Ցեղասպանության ժամանակ եղած անհատների սրբադասումը, որոնց մասին վկայություններ կան, որ եղել է հավատքի նահատակություն, երրորդը Ստալինյան բռնապետության ժամանակ հոգեւորականների եւ աշխարհականների սրբադասումը, որոնք նահատակվել են դարձյալ հավատքի համար, չորրորդը լինելու է ընդհանրապես 1-ից մինչեւ 21-րդ դարում ապրած ղած բոլոր այն անձինք, որոնց հնարավորություն կա ներկայացնելու սրբադասման եւ հինգերորդը` ընդհանրապես այն անձինք, որոնք մինչեւ Ցեղասպանությունը ընկած ժամանակահատվածում հայտնի են եւ հայտնի չեն, որոնց վերաբերյալ ուսումնասիրությունը պետք է տեղի ունենա»,- ասաց Տ. Բագրատ եպիսկոպոս Գալստանյանը:
Նշենք, որ սրբադասման արարողակարգին ներկա են լինելու հայկական եկեղեցու արևեւելյան քույր եկեղեցիների պետերը` անմիջական ընտանիքի եկեղեցիները: Ապրիլի 23-ին, սրբադասման օրը` երեկոյան 19:15 ավարտվելու է արարողակարգը, աշխարհի բոլոր հայկական եկեղեցիներում միաժամանակ հնչելու են 100 խողանջ եւ մեկ րոպե լռությամբ ներկաները հարգելու են Հայոց ցեղասպանության զոհերի հիշատակը: