Ռուս սահմանապահները մաքսանենգ ճանապարհով Հայաստան ապրանք ներմուծելու փորձ են կանխել։ Ինչպես NEWS.am-ին հայտնել են Հայաստանում ՌԴ Անվտանգության դաշնային ծառայության սահմանային վարչությունից, փետրվարի 16-ին Իրանի Իսլամական Հանրապետության քաղաքացի Ֆ.-ն ՀՀ սահմանը հատելիս «Ագարակ» հսկիչ մաքսային կետից փորձել է ավտոբուսով Հայաստան ներկրել ատամնաբուժական սարքավորումներ (տիտանե գամեր, ատամնաբուժական ապարատների կցորդներ, արհեսատական ատամների պատրաստման համար նախատեսված ճենապակու փոշի)։
ՀՀ մաքսային ծառայության ներկայացուցիչների հետ փոխադրամիջոցի համատեղ զննման արդյունքում վարորդի նստատեղի տակ հայտնաբերվել է ավելի քան 100 միավոր մաքսանենգ ապրանք, որը իրավախախտի հետ միասին հանձնել են Մեղրու մաքսատան իրավապահներին հետագա քննության համար։ Մաքսանենգ ապրանքի արժեքը ճշտվում է։