Հայաստանի արտգործնախարարը հնարավորություն չի տվել Հայաստանի, Ադրբեջանի եւ ԵԱՀԿ Մինսկի խմբի համանախագահող երկրների ԱԳՆ ղեկավարների համատեղ հայտարարություն ընդունել: Այդ մասին հայտարարել է Ադրբեջանի արտգործնախարար Էլմար Մամեդյարովը:
«Այսօրվա հանդիպումը 2 ժամից ավելի է տեւել: Երեկ մենք հանդիպել ենք նաեւ ԵԱՀԿ Մինսկի խմբի համանախագահներին, իսկ հանդիպումն այսօր շարունակվել է «3+2» ձեւաչափով: Նրանք մեծ ջանքեր էին գործադրել, որ համատեղ հայտարարություն տարածեին: Ցավոք, Հայաստանի ԱԳՆ ղեկավարը հնարավորություն չտվեց համատեղ հայտարարություն ընդունել՝ քանի որ իր անհամաձայնությունը հայտնեց որոշ հարցերի վերաբերյալ»,- ասել է Մամեդյարովը, հաղորդում է ադրբեջանական APA գործակալությունը:
Այդ պատճառով էլ, Ադրբեջանի ԱԳՆ ղեկավարի խոսքով, ընդունվել է համանախագահ երեք երկրների հայտարարությունը: Ջանքերի գլխավոր պահն այն էր, որ այդ հայտարարությունը եւս մեկ քայլ առաջ էր:
Ադրբեջանցի նախարարը նաեւ նշել է, թե համանախագահները մտադիր են մինչեւ սեպտեմբեր եւս մեկ անգամ այցելել տարածաշրջան՝ հավելելով, որ դեռ հստակ ժամկետ գոյություն չունի:
Նշենք, որ պաշտոնական Երեւանը դեռ չի մեկնաբանել Հայաստանի եւ Ադրբեջանի ԱԳՆ ղեկավարների հանդիպումը: