Գյումրիում 7 հոգանոց ընտանիքի սպանության գործով տուժողի իրավահաջորդների ներկայացուցիչ Երեմ Սարգսյանը նոր միջոնորդություն է ներկայացրել նախաքննական մարմնին: Այս մասին NEWS.am-ի թղթակցին հայտնեց փաստաբանը:
Նա նշեց, որ միջնորդել է քրեական գործ հարուցել Պերմյակովի կողմից ՀՀ պետական սահմանն ապօրինի հատելու փորձ կատարելու դեպքով: Միջնորդության համար հիմք է հանդիսացել հունվարի 13-ին ՌԴ անվտանգության դաշնային ծառայության տարածած հաղորդագրությունը Պերմյակովի ձերբակալության վերաբերյալ, որտեղ մանրամասն ներկայացրել էին ռուս զինվորականին ձերբակալելը, թե ինչպես են նկատել անծանոթի, հրահանգել կանգնել, նախազգուշական օդ են կրակել եւ այլն: Փաստաբանը նկատեց, որ այդ հաղորդագրության մեջ անընդհատ օգտագործվում է իրավախախտ բառը, առկա են առերեւույթ հանցագործության հատկանիշներ, եթե նա ձերբակալվել է, ապա իրավախախտումը կարող է լինել սահմանն ապօրինի հատելու փորձը: Փաստաբանը պահանջում է այդ մասով գործ հարուցել, անհետաձգելի քայլեր ձեռնարկել պարզելու մի շարք հարցեր: «Այս քայլի նպատակներից մեկն էլ այն է, որ կարող են լրացուցիչ հիմքեր ստեղծել Պերմյակովին Հայաստանին փոխանցելու համար: Վերջապես հասարակությունը կստանա այն հարցերի պատասխաններտ, թե ինչ հանգամանքներում, երբ, ինչպես, ում կողմից է ձերբակալվել Պերմյակովը»,-ասաց Երեմ Սարգսյանը:
Ավելի վաղ NEWS.am-ը անդրադարձել էր Երեմ Սարգսյանի ներկայացրած մեկ այլ միջնորդությանը, որը վերաբերում էր մի շարք վարկածներ ճշտելուն, հարցումներ անելուն եւ գործի համար էական հանգամանքներ ճշտելուն: http://news.am/arm/news/252074.html: Այս միջնորդությունը բավարարվել էր:
Հիշեցնենք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, ուր յոթ օր անց մահացել էր:
Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։