Երկու օր անընդմեջ տեղացող առատ ձյունը անանցանելի է դարձրել Լոռու մարզի միջպետական ու տեղական ճանապարհների մի շարք հատվածներ:
NEWS.am-ի թղթակիցը հաղորդում է, որ Վանաձոր-Ալավերդի ավտոճանապարհին մերկասառույցի պատճառով երեկվանից միջպետական ճանապարհին կանգնած են մնացել մարդատար եւ բեռնատար տասնյակ մեքենաներ։
«Ճանապարհն է պետք մաքրել եւ աղ լցնել, որ կարողանանք շարժվել։ Թե չէ որքան պետք է այստեղ կանգնենք։ Մեկ գիշեր արդեն կանգնել ենք, եթե այսօր էլ չմաքրեն, երկրորդ գիշերը պետք է մնանք այստեղ»,-NEWS.am-ի հետ զրույցում ասաց բեռնատարի վրացի վարորդը։
Ճանապարհը սպասարկող կազմակերպությունները վստահեցնում են, որ համապատասխան միջոցներ ձեռնարկել են մեքենաների ընթացքը չխոչընդոտելու համար, ճանապարհներին աղ են լցրել, սակայն սառնամանիքը թույլ չի տալիս վերջնականապես ազատվել մերկասառույցից։ Մերկասառույցի պատճառով որոշ մեքենաներ վնասվել են։ Տեղում այս պահին աշխատում են ճանապարհային ոստիկանները, որոնք վերացնում են ճանապարհի տարբեր հատվածներում մերթ ընդ մերթ առաջացող խցանումները։
Տեսանյութը՝ Ժան Գալստյանի