Վրաստանի Հանրապետությունում ծնված 24-ամյա Արթուր Մ.-ն մեղադրվում է աղջիկ առեւանգելու մեջ: Այս մասին NEWS.am-ը տեղեկանում է Դատական տեղեկատվական համակարգից:
Ըստ մեղադրական եզրակացության՝ Արթուրն անցած տարվա հունիսի 26-ին համաձայնության է եկել Վրաստանի քաղաքացի Գոչա Գոմելառուիի հետ եւ Գյումրի քաղաքի Հաղթանակի պողոտայից ամուսնության նպատակով բռնություն գործադրելու միջոցով բացահայտ առևանգել է Գյումրի քաղաքի բնակչուհի Մ. Պ.-ին:
Արթուր Մ.-ին մեղադրանք է առաջադրվել Քրեական օրենսգրքի 131-րդ հոդվածի 2-րդ մասի 1-ին կետով, այն է՝ Խաբեության, վստահությունը չարաշահելու, բռնության կամ բռնություն գործադրելու սպառնալիքի միջոցով մարդուն գաղտնի կամ բացահայտ առևանգելը, որը կատարվել է մի խումբ անձանց կողմից: Արթուրը կալանավորված է:
Գործը քննվում է Շիրակի մարզի ընդհանուր իրավասության դատարանում: Դատական առաջին նիստը նշանակված է փետրվարի 24-ին:
