Ուկրաինայի նախագահ Պյոտր Պորոշենկոն չի նշելու փետրվարի 23-ը, որը երկար տարիներ նշվել է որպես Կարմիր բանակի բանակի օր, իսկ այժմ Ռուսաստանում կոչվում է Հայրենիքի պաշտպանի օր։ Նա Facebook-ի իր էջում գրել է, որ Ուկրաինայում նմանատիպ տոնը նշվում է հոկտեմբերի 14-ին եւ համընկնում Սուրբ Աստվածածնի տոնի հետ։

«Ես հասկանում եմ, որ իներցիայի ու տարիների սովորույթի ուժով կանայք շնորհավորելու են տղամարդկանց։ Այստեղ ամեն մեկն իրավունք ունի իր որոշումը կայացնելու, բայց փետրվարի 23-ն այսուհետ զրկված է պետական քաղաքական երանգավորումից»,-գրել է Պորոշենկոն։

Նա նշել է իր կնոջ հետ պայմանավորվածության մասին. «Փետրվարի 23-ին նա ինձ չի շնորհավորի, այլ կսպասի հոկտեմբերի 14-ին»։

Պորոշենկոն հույս է հայտնել, որ իր օրինակին կհետեւեն նաեւ մյուսները։ Հայրենիքի պաշտպանի օրը Ռուսաստանում հաստատվել է 1922 թվականին, որպես «Կարմիր բանակի եւ նավատորմի օր»։

Ներկայումս Ռուսաստանում փետրվարի 23-ը նշում են որպես Հայրենիքի պաշտպանի օր եւ 2002-ից այն ՌԴ-ում ոչ աշխատանքային է։ Այն պետական տոն է Բելառուսում, Ղրղզստանում եւ Տաջիկստանում։