Ազգային վիճակագրական ծառայության նախնական տեղեկության համաձայն, նոր տարին Հայաստանի տնտեսության համար այնքան էլ հաջող չի մեկնարկել: Տարիներ առաջ ներդրված «տնտեսական ակտիվության ցուցանիշը» հունվարին տարեկան կտրվածքով հավասարվել է 1.3%-ի: Սակայն արդյունաբերության մեջ արտադրանքի ֆիզիկական ծավալները կրճատվել են 6.3%-ով: Հիշեցնենք, որ անցյալ տարվա հունվարին նույնպես անկում է գրանցվել՝ 3.3%-ով: Այսպիսով, հունվարին արդյունաբերական արտադրանքի ծավալները երկու տարվա ընթացքում կրճատվել են 10%-ով:
Ընդհանուր առմամբ, անցյալ տարի հայրենական արտադրության վրա բացասաբար անդրադարձավ լեռնահանքային արդյունաբերության արտադրանքի ֆիզիկական ծավալների եւ բաց հանքերի մշակման անկումը՝ 7.6%-ով: Դրա հետեւանքով հայրենական արդյունաբերական արտադրանքի դինամիկան համեմատաբար դանդաղել է՝ ավելի քան 1 տոկոսային կետով:
Վերը նշված արդյունաբերական ճյուղերի գծով անկում է գրանցվել երկու ոլորտներում. մետաղական հանքերի արդյունահանման եւ արտադրանքի ծավալներով դրան զգալիորեն զիջող «լեռնահանքային արդյունաբերության այլ ոլորտների» գծով:
Անցյալ տարի պղնձի համաշխարհային գները հանգեցրին այդ մետաղի հանքաքարի եւ խտանյութի արտահանման բացասական շարժին: Չնայած ծավալների առումով արտահանումը 6.9%-ով աճել է, մաքսային արժեքը կրճատվել է 15.7%-ով: Չնայած դրան, անցյալ տարվա արդյունքներով, «պղնձի հանքաքար եւ խտանյութ» խումբը նախկինի պես արտահանման ծավալներով առաջատար է եղել:
Բացասական երեւույթ է նկատվել նաեւ հայրենական արդյունաբերության մեկ այլ ճյուղում՝ էլեկտրաէներգիայի արտադրության մեջ: Հունվարին անկումը կազմել է տարեկան կտրվածքով գրեթե 159 մլն կՎտ/ժ-ով կամ 19.7%-ով պակաս: Կարելի է ենթադրել, որ դա կապված է այդ էներգակրի սպառման կրճատման հետ, առաջին հերթին՝ բնակչության, եւ երկրորդ՝ արդյունաբերական ձեռնարկությունների կողմից:
Նշենք, որ Իրանի համար էլեկտրաէներգիայի արտադրության կրճատման գործոնը կարող էր նվազագույն ազդեցություն ունենալ: Անցյալ տարվա ընթացքում այդ երկիր էլեկտրաէներգիայի արտահանումը կրճատվել է «ընդամենը» 132 մլն կՎտ/ժ-ով:
Ամենայն հավանականությամբ, ազդել է վերջին տարիներին սակագնի երկնիշ թանկացումը (գրեթե 40%-ով), որն ուղեկցվել է նաեւ բնական գազի թանկացմամբ, ինչն էլ բաժանորդներին ստիպել է տնտեսել այդ էներգակիրները: Չնայած չեն բացառվում նաեւ այլ պատճառները:
