«Ինտեր ՌԱՕ» ԲԲԸ-ն կդիմի Հայաստանի նախագահ Սերժ Սարգսյանին «Հայաստանի էլեկտրացանցեր» ՓԲԸ-ի պարտքերի վերակազմավորման համաձայնագրի խնդրանքով։ Այս մասին փետրվարի 25-ին Հայաստանի Հանրային ծառայությունները կարգավորող հանձնաժողովի նիստին հայտարարել է «Էլեկտրացանցերի» գործադիր տնօրեն Եվգենի Բիբինը։ Նա հիշեցրել է, որ Հայաստանում է գտնվում «Ինտեր ՌԱՕ»-ի աշխատանքային խումբը, որը ուսումնասիրում է ձեռնարկությունում տիրող իրավիճակը։
«Ներկայումս մենք վարկեր վերցնելու ու հետագա կայունություն ապահովելու հարցի հետ կապված խնդիրներ ունենք։ Մենք ենթադրում ենք, որ 3 շաբաթվա ընթացքում «Ինտեր ՌԱՕ»-ի նախագահ Բորիս Կովալչուկի եւ Հայաստանի նախագահ Սերժ Սարգսյանի հանդիպման համար համապատասխան փաստաթուղթ կպատրաստվի։ Հուսամ, կստորագրվի համաձայնագիր, որը թույլ կտա հարաբերություններ հաստատել բանկային ոլորտի հետ եւ հասնել վարկերի վերակազմավորմանը»,- հայտարարել է Բիբինը։
Հիշեցնենք, որ արտադրող կայաններին «Էլեկտրացանցեր»-ի ունեցած պարտքը վերջին 2 տարվա ընթացքում հասել է 13 մլրդ դրամի։