Նորք Մարաշում զույգ 8-ամսական երեխաներին, նրանց մորը եւ մի մեծահասակ կնոջ վրաերթ արած վարորդի նկատմամբ ընտրված խափանման միջոց կալանավորումը բողոքարկել են: Այս մասին NEWS.am-ի թղթակցի հետ զրույցում ասաց նրա փաստաբանը՝ Լուսինե Մարտիրոսյանը:
Նա նշեց, որ իր պաշտպանյալը առողջական խնդիրներ ունի, չի կարող գտնվել մեկուսարանում եւ այդ հիմքով էլ խափանման միջոց ընտրված կալանքը բողոքարկել են: Փաստաբանը նշեց, որ Ռ. Ավետիսյանը մեքենան վարել է մինչեւ 40 կմ/ժ արագությամբ, ալկոհոլ օգտագործած չի եղել եւ դեպքի վայրից էլ փախուստի չի դիմել: Ինչ վերաբերում է վարորդի՝ էպիլեպսիա կամ այլ հիվանդություն ունենալուն, փաստաբանն ասաց, որ որեւէ բան չի կարող հայտնել, դա կպարզեն փորձագետները: «Էպիլեպսիա է, թե սրտի այլ նոպա, չեմ կարող ասել, դա կասեն մասնագետները: Մի բան հստակ է, վրաերթից վայրկյաններ առաջ նա անգիտակից վիճակում է եղել, նրա սիրտը վիրահատված է, բոլոր բժշկական փաստաթղթերն էլ եղել են մեքենայում, դեպքի հենց նախորդ օրն էլ հետազոտվել է»,-ասաց փաստաբանը՝ հավելելով, որ չի ցանկանում այլ մանրամասներ հայտնել գործից:
Ավելի վաղ NEWS.am-ը հայտնել էր, որ փետրվարի 19-ին՝ ժամը 11:30-ի սահմաններում, քաղացացի Ռ.Ավետիսյանի վարած «Ֆոլքսվագեն» մակնիշի ավտոմեքենան ընթացել է Մարաշի Արմենակյան փողոցով Հերացու փողոցի ուղղությամբ, շուրջ 40կմ/ժ արագությամբ: Հասնելով Արմենակյան փողոցի թիվ 122 հասցեի դիմաց՝ վրաերթի է ենթարկել 82-ամյա Անահիտ Կարապետյանին, ապա՝ դուրս եկել երթեւեկելու գոտուց եւ բարձրանալով մայթին վրաերթի ենթարկել 29-ամյա Աննա Հարությունյանին, նրա մանկահասակ երկվորյակ որդիներին, այնուհետեւ բախվել ցանկապատին: Վրաերթի հետեւանքով մանկահասակ երեխաներից մեկը տեղում մահացել էր, մյուս երեք քաղաքացիներին տեղափոխել էին հիվանդանոց։ Օրեր անց «Սուրբ Աստվածամայր» բժշկական կենտրոնի Վերակենդանացման բաժանմունքում մահացել է նաեւ զույգ եղբայրներից ողջ մնացածը: Վթարի հետեւանքով վնասվածքներ է ստացել նաեւ ավտոմեքենայի ուղեւորը՝ վարորդի կինը, ով ամբուլատոր բուժօգնություն է ստացել «Քանաքեռ-Զեյթուն» բժշկական կենտրոնում։
Դեպքի առթիվ հարուցվել է քրեական գործ՝ ՀՀ քրեական օրենսգրքի 242-րդ հոդվածի 2-րդ մասով, ավտոմեքենայի վարորդը ձերբակալվել է, ապա նաեւ կալանավորվել: Նա մեղադրվում է ճանապարհային երթեւեկության կանոնները խախտելու մեջ, ինչն անզգուշությամբ առաջացրել է 2 մարդու մահ։