Հնդկաստանում տարբեր պետական հաստատություններից տեղեկությունների արտահոսքի գործում ներգրավված են առնվազն 5 նախարար, որոնց թվում՝ երկրի պաշտպանության նախարարը։ Այս մասին գրում է The Times of India-ն։
Ըստ այդ տեղեկությունների՝ հինգշաբթի առավոտյան ձերբակալվել են հանցագործ խմբի եւս 2 անդամ։ Նշենք, որ խմբավորումը տարիներ շարունակ արժեքավոր տեղեկություններ էր գողանում Հնդկաստանի կառավարության մի շարք նախարարություններից։
Հետաքննության վարկածով՝ հանցագործության կազմակերպիչը լրագրող Սանտանու Սայկիան է, որը հանդիսանում էր Indianpetro կայքի խմբագիրը։ Նրան իր 6 հանցակիցների հետ անցյալ ուրբաթ ձերբակալել են պետական փաստաթղթերը գողանալու եւ մասնավոր ընկերություններին վաճառելու մեղադրանքով։ Հարցաքննություններից հետո ձերբակալվածների թիվը հասել էր 15-ի, գրում է ՏԱՍՍ-ը։
Իրավապահ մարմինների տեղեկություններով՝ գաղտնի փաստաթղթերի պատճենները նախարարությունից դուրս էին բերվում գիշերը եւ վաճառվում էին պատվիրատուներին։ Կախված փաստաթղթի կարեւորությունից՝ խումբը մեկ վաճառքից ստացել է 500 հազարից մինչեւ 20 մլն ռուփի (8 հազար դոլարից 323 հազար դոլար)։