Արմավիրի մարզի Մեծամոր քաղաքի բնակչուհի, հղիության 5-րդ ամսում մահացած 28-ամյա Նարինե Շարոյանի գործով մեղադրանք է առաջադրվել «Արմավիր» ԲԿ ծննդատան հերթապահ գինեկոլոգ Հասմիկ Հակոբյանին: Այս մասին NEWS.am-ին հայտնեցին ՀՀ Քննչական կոմիտեի մամուլի ծառայությունից:
Հասմիկ Հակոբյանին մեղադրանք է առաջադրվել ՔՕ 130-րդ հոդվածի 2-րդ մասով, խափանման միջոց է ընտրվել ստորագրություն չհեռանալու մասին:
«Հասմիկ Հակոբյանը պատշաճ չի կատարել իր մասնագիտական պարտականությունները եւ հղի կնոջն ուղարկել է ինֆեկցիոն բաժանմունք, որտեղ հնարավոր չի եղել ժամանակին ախտորոշել հղիության հետ կապված բարդությունները եւ կատարել անհրաժեշտ միջոցառումներ»,- ասացին Քննչական կոմիտեից:
Նշենք, որ ավելի վաղ մեզ հետ զրույցում Հասմիկ Հակոբյանը պնդել էր, որ իրեն մեղավոր չի ճանաչում:
Հիշեցնենք, որ Նարինե Շարոյանին «Արմավիր» բժշկական կենտրոն տեղափոխել էին թունավորում ախտորոշմամբ, նա փսխել էր, այնուհետեւ ինֆեկցիոն բաժանմունք տեղափոխվելուց հետո սկսել էր արնահոսել, նրան կեսարյան հատում էին արել, հեռացրել արգանդը: Վիրահատությունից հետո Նարինեին «Արմավիր» ԲԿ-ից տեղափոխել էին Երեւանի «Արմենիա» բժշկական կենտրոն, որտեղ նա հուլիսի 2-ին մահացել էր։ 28-ամյա Նարինեն 7 տարեկան երեխա ուներ։
Դեպքի առթիվ նշանակված փորձաքննության՝ այսօր հրապարակված արդյունքներով՝ խախտումներ են հայտնաբերվել Նարինե Շարոյանի նկատմամբ «Արմավիր» բժշկական կենտրոնում բուժօգնություն ցուցաբերելու ընթացքում։
Դեպքի առթիվ ՀՀ քրեական օրենսգրքի 130-րդ հոդվածի 2-րդ մասով հարուցված քրեական գործը Երեւանի քննչական վարչության Աջափնյակ եւ Դավթաշեն վարչական շրջանների քննչական բաժնից ուղարկվել է ՀՀ քննչական կոմիտեի Արմավիրի մարզային քննչական վարչության Արմավիրի քննչական բաժին, որտեղ այն ընդունվել է վարույթ: