Ռուսերենով մի քանի ֆիլմերը դժվար թե խեղաթյուրեն հայկական եթերը: Այս մասին NEWS.am-ի թղթակցի հետ զրույցում նշեց Հայաստանի հեռուստատեսության եւ ռադիոյի ազգային հանձնաժողովի նախագահ Գագիկ Բունիաթյանը:
«Խելամիտ սահմաններում ռուսերենով հեռարձակումը, կարծում եմ, վնաս չէ: Հնարավորության սահմաններում ֆիլմերը կրկնօրինակվում են հայերեն, բայց ամեն ինչ եւ միանգամից թարգմանելը, ինչպես մեկ անգամ արդեն ասել եմ, չափազանց ծախսատար է: Կրկնօրինակումը ֆիլմի արտոնագրից ավելի թանկ է»,- պարզաբանեց Բունիաթյանը:
Նշենք, որ հանրապետության մասնավոր հեռուստաալիքները հաճախ են ռուսերեն ֆիլմեր ցուցադրում, ինչպես նաեւ արտասահմանյան ժապավեններ՝ ռուսերեն կրկնօրինակմամբ:
Հավելենք նաեւ, որ չնայած 1990-ական թվականների զգալի արտագաղթին, հանրապետությունում դեռեւս մեծ թվով ռուսախոս հայեր կան: