Ուկրաինայի Ազգային անվտանգության եւ պաշտպանության խորհրդի քարտուղար Ալեքսանդր Տուրչինովը ցավակցություն է հայտնել Ռուսաստանում սպանված քաղաքական գործիչ Բորիս Նեմցովի հարազատներին եւ մտերիմներին՝ նշելով, որ ինքը շատ լավ էր նրան ճանաչում։
«Ցավակցում եմ Բորիս Նեմցովի հարազատներին եւ մտերիմներին։ Ես նրան լավ էի ճանաչում։ Բորիսը համարձակ, բաց մարդ էր։ Այդպիսին էլ կապրի մեր հուշերում։ Ռուսաստանը կորցրեց եւս մեկ կարկառուն անձնավորության, որը հրաժարվել էր ծնկաչոք ապրել»,- ասված է հայտարարության մեջ։
Ավելի վաղ Ուկրաինայի նախագահ Պյոտր Պորոշենկոն հայտարարել էր, որ Նեմցովը Ռուսաստանն ու Ուկրաինան իրար կապող կամուրջ էր, եւ հույս էր հայտնել, որ մարդասպանները վաղ թե ուշ կկրեն իրենց պատիժը։
ՌԴ նախագահի մամուլի խոսնակ Դմիտրի Պեսկովն արդեն հայտարարել է, որ այս դաժան հանցագործությունը պատվիրված սպանություն է հիշեցնում եւ բացառապես սադրիչ բնույթ է կրում։ ՌԴ նախագահ Վլադիմիր Պուտինը ցավակցություն է հայտնել Նեմցովի հարազատներին եւ հանձնարարել է ՌԴ Քննչական կոմիտեին, ՆԳՆ-ին եւ ԱԴԾ-ին քննչական խումբ ստեղծել եւ անձնական հսկողության տակ պահել հետաքննության ընթացքը, գրում է «ՌԻԱ Նովոստի»-ն։
