Հինավուրց հայկական վզնոց, որը Հայոց ցեղասպանության տարիներին ձեռքից ձեռք է անցել եւ հասել մինչեւ մեր օրերը: Հիմա այն գտնվում է Նյու Յորքի մի մասնավոր պատկերասրահում եւ պատկանում է հայտնի թուրք ընտանիքի: Այս պատմությունն է 20-րդ դարասկզբի ողբերգական իրադարձությունների մասին ռեժիսոր Սերժ Գաբյանի՝ «Նռնաքարե վզնոցը» անվանումով լիամետրաժ գեղարվեստական ֆիլմի հիմքում:
NEWS.am-ի թղթակցի հետ զրույցում Սերժ Գաբյանը նաեւ ժապավենի որոշ այլ մանրամասներ պատմեց: Գլխավոր հերոսուհին՝ Նաիրին, հայուհի է, հագուստի մոդելավորող, որի նախնիներին էլ պատկանել է զարդը: Դրա նախշերն ու սիմվոլիկան ուղղակի կապ ունեն աղջկա ընտանիքի հետ: Հիմա Նաիրին իր ընտանիքի կանանցից սերնդեսերունդ իրեն հասած զարդանախշերն օգտագործելով՝ հագուստի հավաքածու է ստեղծում եւ հայտնվում է Նյու Յորքում: Այստեղ էլ սկսվում է ժապավենի հիմնական պատմությունը:
Ռեժիսորի խոսքով, հանդիսատեսը ֆիլմում կտեսնի այս յուրօրինակ զարդի ամբողջ պատմությունը, որը սկսվել է 17-րդ դարից, անցել 20-րդ դարասկզբի ողբերգական իրադարձությունների միջով եւ հասել մինչեւ մեր օրերը:
Ֆիլմի ուղղությամբ Սերժ Գաբյանն ու Ռուսաստանում գործող «Աշխարհի մարդիկ» հիմնադրամի նախագահ Ստեֆան Հեքիմյանը բավական երկար են աշխատել: Եվ արդեն փետրվարին պայմանագիր է կնքվել Եվրոպական ֆինանսական մի կազմակերպության հետ, որի անունը ռեժիսորն առայժմ չցանկացավ նշել: Գաղափարը դուր է եկել նաեւ Ֆրանսիայի, ԱՄՆ-ի եւ Ռուսաստանի հայկական մի շարք այլ կազմակերպությունների ղեկավարների, որոնք խոստացել են աջակցել ֆիլմի ստեղծմանն ու հնարավորինս արագ ներկայացնել այն հանդիսատեսի ուշադրությանը: Ծրագրվում է, որ «Նռնաքարե վզնոցը» մեծ էկրան կբարձրանա այս տարվա նոյեմբերին:
«Ֆիլմի հիմնական լեզուն անգլերենն է, քանի որ մեր գերխնդիրն է՝ մի ընտանիքի ու հայկական մի զարդի պատմությամբ համաշխարհային հանրության ուշադրությունը եւս մեկ անգամ սեւեռել Հայոց ցեղասպանության խնդրի եւ դրա հետեւանքների ուղղությամբ»,- նշեց Սերժ Գաբյանը:
Նկարահանումներն անցկացվելու են Հայաստանում, Ղազախստանում, Լատվիայում եւ ԱՄՆ-ում: Գլխավոր պրոդյուսերները՝ Ստեֆան Հեքիմյանն ու նրա ամերիկացի գործընկերը, ինչպես նաեւ ժապավենի սցենարի հեղինակը՝ Հայաստանից Լիլիթ Մկրտչյանը, բանակցություններ են վարում հոլիվուդյան մի շարք հայտնի աստղերի գործակալների հետ: Գլխավոր հերոսուհու կերպարի համար նախատեսվում է հրավիրել Էմմա Ուոթսոնին կամ Էնն Հեթըուեյին, գլխավոր հերոսի կերպարի համար՝ Բրեդլի Կուպերին կամ Ջոշ Հարթնեթին: Երկրորդական դերերում էլ ժապավենի ստեղծագործական խումբը ցանկանում է տեսնել Փոլ Բեթանիին, Շայա Լյաբոֆին, Բենեդիկտ Քամբերբեթչին եւ Մոնիկա Բելուչիին: «Որոշ գործակալներ արդեն հավանություն են տվել սցենարին եւ նույնիսկ հիացմունք արտահայտել: Մոտ օրերս հարցն ավելի հստակ կդառնա»,- ասաց ռեժիսորը:
Հավելենք, որ արդեն պայմանագիր է ստորագրվել Ռուսաստանում բնակվող հագուստի հայ մոդելավորող Նարինե Հարությունյանի եւ NARNY բրենդի հետ, որն այս ֆիլմի համար հավաքածու է ստեղծում: Իսկ «Նռնաքարե վզնոցը» մոնտաժվելու է հոլիվուդյան ստուդիաներից մեկում:
Հարկ է նշել նաեւ, որ «Նռնաքարե վզնոցը» գեղարվեստական ֆիլմի նախագծի ցուցադրության իրավունքները պատկանում են Ռուսաստանում գործող «Աշխարհի մարդիկ» հիմնադրամին:
Ռեժիսորը նշեց նաեւ, որ ֆիլմից ստացված եկամուտների մեծ մասն «Աշխարհի մարդիկ» հիմնադրամն օգտագործելու է հայկական ժամանակակից մշակույթը եւ պատմամշակութային ժառանգությունը համաշխարհային հանրությանը բազմակողմանիորեն ներկայացնելու իր առաքելությունը շարունակելու համար:
