Եթե ամբողջ փոքր ու միջին բիզնեսը խոշոր մատակարարներից հաշիվ-ապրանքագիր պահանջի, վերջիններս ստիպված կլինեն զիջել: Այս մասին, այսօր՝ մարտի 2-ին, մամուլի ասուլիսի ժամանակ նշել է ԱԺ ՀՀԿ խմբակցության պատգամավոր, ԱԺ տնտեսական հանձնաժողովի նախագահ Վարդան Այվազյանը՝ մեկնաբանելով «Շրջանառության հարկի մասին» օրենքի փոփոխությունները, որը գտնվում է ԱԺ օրակարգում:
«Կարծում եմ, դուք չեք համոզի, որ եթե բոլոր 60 հազարից ավելի փոքր ու միջին առեւտրականները սկսեն հաշիվ-ապրանքագիր պահանջել խոշոր ներկրողից, նրանց բոլորին կմերժեն եւ ապրանք չեն տա, կլինի շաքարի, ձեթի, սպորտային հագուստի կամ մեկ այլ ապրանքի ներկրողը: Եթե չվաճառի, այդ ապրանքն ի՞նչ է անելու»,-ասել է Այվազյանը:
Դիտարկմանը, թե «իր խանութներում կվաճառի», ՀՀԿ-ական պատգամավորը պատասխանել է. «Դուք, երեւում է, վատ եք պատկերացնում... Ես, օրինակ, ապրում եմ Չարենցավանում, որտեղ չկա ոչ մի «Երեւան Սիթի» ու «ՍԱՍ» (Սամվել Ալեքսանյանին ու Արտակ Սարգսյանին պատկանող սուրպերկմարկետների ցանց-խմբ)»:
Հիշեցնենք, որ 2014թ. հոկտեմբերի 1-ից ուժի մեջ է մտել «Շրջանառության հարկի մասին» ՀՀ օրենքը, ըստ որի տոնավաճառների աշխատողները իրենց ապրանքաշրջանառության վերաբերյալ փաստաթղթեր պետք է ներկայացնեն հարկային մարմնին։ Նշենք, որ Կառավարությունը հունվարի 31-ի իր արտահերթ նիստում որոշել է մինչեւ հուլիսի 1-ը հետաձգել «Շրջանառության հարկի մասին» օրենքի վիճահարույց պահանջի՝ ապրանքների փաստաթղթավորման կիրառումը։ Շրջանառության հարկ վճարողները տարեկան մինչեւ 58 մլն 350 հազար (122 հազար դոլար)շրջանառություն ունեցող ձեռնարկություններն են։
