Հայաստանի ԱԺ արտահերթ նիստում երկրորդ եւ վերջնական ընթերցմամբ ընդունվեց «Շահութահարկի մասին» օրենքի փոփոխությունները (68 կողմ, 11 դեմ, 23 ձեռնպահ): Այս օրինագծով առաջարկվում է արտոնյալ պայմաններ ապահովել գերհզոր արտահանող ընկերությունների համար:
Ավելի վաղ ընդդիմությունը կտրուկ կերպով քննադատել է այս օրինագիծը՝ նշելով, որ խոշոր արտահանողները կփակեն ոչ մեծ արտահանողների թթվածինը:
Նկատենք, որ այս փոփոխությունները, ի տարբերություն առաջին ընթերցմամբ ընդունված տարբերակի, քվեարկության դրվեց առանց քննարկման: Կարծիքների փոխանակությունը տեղի է ունեցել միայն ԱԺ տնտեսական հարցերի հանձնաժողովում:
Հիշեցնենք, որ ավելի վաղ «Շահութահարկի մասին» օրենքի փոփոխությունների օրինագիծն առաջարկում է, որ տարեկան 50 մլրդ դրամի արտահանում ունեցող ընկերությունների համար շահութահարկը 20 տոկոսից դառնա 2 տոկոս: Այժմ 50 մլրդ դրամի շեմին ավելացել է եւս մեկը՝ 40 մլրդ դրամ, որի դեպքում շահութահարկը կլինի 5 տոկոս:
Եթե օրինագծի նախորդ տարբերակում հարկային արտոնության կարող էր հավակնել միայն մեկ արտահանող, հիմա թույլ է տրվում ընկերություններին միավորվել խմբի մեջ, որպեսզի կարողանան օգտվել այդ արտոնությունից: Օրինագծում, սակայն, չի նշվում, թե որ դեպքում ընկերությունները կարող են համարվել խումբ: