Ռուսաստանն իր արտադրության բաժինները չի տեղակայի Հայաստանում, ինչպես խորհրդային ժամանակաշրջանում: Այս մասին, այսօր՝ մարտի 3-ին, ԱԺ-ում հայտարարել է ՀԱԿ խմբակցության պատգամավոր, նախկին վարչապետ Հրանտ Բագրատյանը՝ հավելելով, որ հետեւաբար ավելացված արժեքի հարկը որպես պետությունների միջեւ եկամուտը կիսելու միջոց, սպառել է իրեն եւ ժամանակն է անցնել շրջանառության հարկի:
Նրա խոսքով՝ փոքր բիզնեսն, օրինակ, մինչեւ 115 մլն դրամի շրջանառության դեմքում, պետք է հարկվի 5-6 տոկոսով, խոշորը՝ 10-12 տոկոսով: Ընդ որում, խոշոր բինեսի դեպքում եւս առաջին 115 մլն դրամի շրջանառւթյունը պետք է հարկվի 5-6 տոկոսով:
«Եվ վերջ. 4-5 անգամ կկրճատվեն հարկային ստուգումները: Չէ որ բիզնեսի 90 տոկոսը հարկայինից բողոքում է հենց ԱԱՀ-ի պատճառով: Իսկ ինչո՞ւ չվերացնենք ԱԱՀ-նԼ Պարզապես վախենում ենք չհավաքել ներկայիս 1,1 տրլն դրամի հարկերը»,-ասել է Բագրատյանը՝ հիշեցնելով խորհրդային փորձը:
«Համարվում է, որ ԽՍՀՄ-ում հարկային իդելական համակարգ էր գործում, բանկային կայունության գործիքների առումով՝ նույնպես: Եվ ոչ ոք չէր բողոքում հարկային տեսուչներից խորհրդային ժամանակ: Նրանք չէին սանրում ձեռնարկությունը»,-ասել է Բագրատյանը:
«Ինչպես առաջացավ ԱԱՀ-ն: Եվրոպական ածխի միությունում, երբ գերմանացիները, ֆրանսիացիները եւ մյուսները չգիտեին՝ ինչպես բաժանել եկամուտը համատեղ ձեռնարկությունների դեպքում: Ֆրանսիացիներն էլ առաջարկեցին ԱԱՀ-ն, բայց այդպիսի կոոպերացիա Հայաստանում ու ԼՂՀ-ում չկա: Մեր մենթալիտետը տարբեր է: Իսկ Ռուսաստանը իր արտադրությունները չի դնի Հայաստանում: Չի լինի նման բան, խորհրդային ժամանակներն անցել են եւ չեն վերադառնալու»,-ընդգծել է Բագրատյանը:
Նա տեղեկացրել է, որ ԱՄՆ-ում վաղուց շրջանառության հարկը կա: «Չինաստանը երկար ժամանակ դա չէր անում, իսկ հիմա արագ անցնում է 13-տոկոսանոց շրջանառության հարկի: Ճապոնիայում նույնպես այդ համակարգն է: Եվրամիությունում, հեղինակավոր տնտեսական ֆորումում, որին ես մասնակցում էի, ելույթ ունեցողները հայտարարեցին, որ ԵՄ-ն երկու չլուծված հարց ունի՝ արտարժույթի փոխարժեքը, որը չեն կարողանում սահմանել այնպես, որ ձեռնտու լինի եւ արտահանողների եւ ներքին շուկայի համար, եւ երկրորդը՝ ԱԱՀ-ն է»,-ընդգծել է նախկին վարչապետը: