Ֆրանսիական «Ազգային ճակատ» կուսակցության առաջնորդ Մարին Լե Պենը հրաժարվել է հանդիպել հանրահայտ երգչուհի Մադոննայի հետ, որը Charlie Hebdo շաբաթաթերթի խմբագրության վրա կատարած հարձակումից հետո հրավիրել էր քաղաքական գործին մարդու իրավունքների շուրջ քննարկում վարելու համար։
Հունվարի 7-ին 12 մարդու կյանք խլած ահաբեկչությունից հետո Լե Պենը քննադատել էր խմբագրատան վրա կատարած հարձակումը, գրում է «ՌԻԱ Նովոստի»-ն։
«Ես ընդամենը աշխարհին խաղաղություն եմ ցանկանում։ Այդ պատճառով առաջին բանը, որի մասին ես մտածեցի, Մարին Լե Պենին հանդիպելն ու նրա հետ զրուցելն էր։ Ես կցանկանայի նրա շուրթերից անձամբ լսել, թե ինչ է նա մտածում Ֆրանսիայում եւ առհասարակ ամբողջ աշխարհում մարդու իրավունքների շուրջ տիրող իրավիճակի մասին»,- հայտարարել է Մադոննան Canal+ հեռուստաալիքի եթերում։
Մարին Լե Պենը երեքշաբթի RTL ռադիոկայանի եթերում մերժել էր Մադոննայի առաջարկը։
