Նախկին նախագահների կենսաթոշակի մասին օրինագիծը սխալ է կազմված եւ արժեզրկում է Հայաստանի նախկին նախագահի ինստիտուտը։ Այս մասին մարտի 3-ին խորհրդարանում հայտարարել է ՀՅԴ խմբակցության պատգամավոր Արծվիկ Մինասյանը՝ մեկնաբանելով ««ՀՀ նախագահի վարձատրության,սպասարկման և անվտանգության ապահովման մասին» օրենքում փոփոխությունների օրինագիծը։
Մասնավորապես Մինասյանի համար անհասկանալի է դրույթը, որի համաձայն՝ նախագահը թոշակ չի ստանում այնքան ժամանակ, քանի դեռ այլ պաշտոն է զբաղեցնում, որի դիմաց վճարվող աշխատավարձը գերազանցում է թոշակի չափը։
«Դու չե՞ք մտածել, թե կողքից ոնց է նայվում այն հանգամանքը, որ պետությունը ստուգում է՝ իր նախկին նախագահը աշխատում է, թե չի աշխատում, իսկ նա պետք է բացատրություն գրի։ Հիմա ինչ, դուք պետք է հայց ուղարկեք Մոսկվա, որպեսզի ստուգեք աշխատում է արդյոք Ռոբերտ Քոչարյանը, թե՞ ոչ (որպես ԱՖԿ «Սիստեմա» Խորհրդի անդամ-խմբ.)։ Կամ միգուցե նախկին նախագահներից մեկը համալսարանում մի որեւէ ամբիոն է ղեկավարում։ Եւ ի՞նչ։ Նախկին նախագահը ձեզ տեղեկանք պե՞տք է գրի, ի՞նչ է»,- հայտարարել է Մինասյանը։
Ըստ նրա՝ նախկին նախագահին ոչ թե թոշակ պետք է վճարել, այլ պատվո վճար եւ վճարել դա անկախ ամեն ինչից։ «Դրա իմաստը ոչ թե նախկին նախագահներին հատկացվող սոցիալական օգնությունն է, այլ նախկին նախագահի ինստիտուտի նկատմամբ հարգանքը»,- ընդգծել է պատգամավորը։
Հիշեցնենք, որ օրինագիծն առաջարկում է նախկին նախագահների համար թոշակ սահմանել գործող նախագահի աշխատավարձի 70 տոկոսի չափով։