Անհասկանալի է՝ Հայաստանի նախկին նախագահների ինչներին է պետք պատվավոր թոշակը: Այս մասին, այսօր՝ մարտի 3-ին ԱԺ-ում հայտարարել է «Ժառանգություն» խմբակցության պատգամավոր Զարուհի Փոստանջյանը՝ «ՀՀ նախագահի վարձատրության, սպասարկման եւ անվտանգության ապահովման մասին» օրենքի նախագծի քննարկման ժամանակ, որով սահմանվում է, որ նախկին նախագահների թոշակը պետք է կազմի գործող նախագահի աշխատավարձի 70 տոկոսը:
«Բացատրեք ինձ, խնդրում եմ, նրանց ինչի՞ն է պետք այդ թոշակը: Որքան ես հասկանում եմ, երկու նախկին նախագահներն էլ բոլորովին աղքատ չեն: Եվ ի՞նչ եք ասելու սեփական ժողովրդին, երբ մոտ մեկ մլն մարդ ապրում է աղքատության սահմանից այն կողմ»,-հայտարարել է Փոստանջյանը:
Նրա խոսքով՝ տպավորություն է ստեղծվում, որ պետությունն ուզում է թոշակի ուղարկել նախկին նախագահներին: Հատկապես դա վերաբերում է Ռոբերտ Քոչարյանին, քանի որ Լեւոն Տեր-Պետրոսյանը բազմիցս հայտարարել է, որ գտնվում է թոշակի տարիքում, հավելել է նա: