Նախագահի ինստիտուտի հարցը կոնկրետ նախագահին սիրել-չսիրելու հարց չի։ Այդ մասին խորհրդարանում հայտարարել է ԱԺ նախագահ Գալուստ Սահակյանը՝ ելույթ ունենալով ««ՀՀ նախագահի վարձատրության,սպասարկման եւ անվտանգության ապահովման մասին» օրենքում փոփոխությունների օրինագծի քննարկման ժամանակ։
Նրա խոսքով, իրեն զարմացրել է ընդդիմության ռեակցիան, որոնք ամեն ինչ հանգեցնում են կոնկրետ մարդկանց։
«Հասկանալի է, որ եթե, ասենք, նախագահին ընտրել է քաղաքացիների 55 տոկոսը, մյուս 45 տոկոսը կարող են չսիրել կամ անտարբեր լինել։ Բայց այդ մասին դատողություններ անելն ու հանրությանը ներկայացնելը, չեմ կարծում, որ ճիշտ է»,- ասել է Սահակյանը։
ԱԺ նախագահը հայտարարել է, թե եղել է Լեւոն Տեր-Պետրոսյանի ամեռնաակտիվ քննադատներից մեկը, բայց ոչ անձի, այլ գործողությունների։ ««Եւ ի՞նչ։ Այսինքն, Տեր-Պետրոսյանը մեր ժողովրդի պատմության մեջ դեր չի ունեցե՞լ։ Իսկ ինչպե՞ս ողջ ժողովուրդը հետեւեց նրան եւ գնաց անկախության հետեւից։ Ինչպե՞ս ենք հաղթել պատերազմում։ Ախր այդ ամենը եղել է։ Այո, մարդիկ սխալներ անում են, ուրեմն պետք է դադարե՞նք հարգել նախագահի ինստիտուտը»,- հարցրելէ Սահակյանը։
Հիշեցնենք, որ օրինագիծն առաջարկում է նախկին նախագահների համար թոշակ սահմանել գործող նախագահի աշխատավարձի 70 տոկոսի չափով։