«Բարգավաճ Հայաստան» կուսակցության առաջնորդի պաշտոնում Գագիկ Ծառուկյանին փոխարինելու է Նաիրա Զոհրաբյանը։ Այս մասին մարտի 4-ին լրագրողներին հայտարարեց ԱԺ ԲՀԿ խմբակցության պատգամավոր Միքայել Մելքումյանը։ Նրա խոսքով՝ Ծառուկյանը իր պաշտոնը լքելու մասին կհայտարարի մարտի 5-ին՝ կուսակցության համագումարի ժամանակ։ Այդ ժամանակ էլ կընտրվի նոր առաջնորդ։
«Մենք քննարկել ենք հարցը, եւ Նաիրա Զոհրաբյանից բացի այլ թեկնածու չկա։ Կարծում եմ, որ Զոհրաբյանի թեկնածությունը անպայման կպաշտպանեն։ Համագումարից հետո կկայանա քաղխորհրդի նիստը, որտեղ կորոշվի կուսակցության ղեկավարի տեղակալի հարցը»,- հայտարարել է Մելքումյանը։
Նշենք, որ նախագահ ՍերԺ Սարգսյանը փետրվարի 12-ին ՀՀԿ խորհրդի նիստում ունեցած ելույթի ժամանակ հայտարարել էր, որ Գագիկ Ծառուկյան քաղաքական դերակատարը երկրի համար դարձել է չարիք։ Նա նաեւ Ծառուկյանին ազատել է Ազգային անվտանգության խորհրդի անդամի կարգավիճակից, խոստացել, որ գործընթաց է սկսվելու Ծառուկյանի՝ ԱԺ նիստերից պարբերաբար բացակայելու կապակցությամբ։ Մեկ օր անց Ծառուկյանը հանդես եկավ հայտարարությամբ՝ նշելով, որ իրենք գնում են իշխանափոխության: Սակայն փետրվարի 17-ին տեղի ունեցած Սարգսյան-Ծառուկյան հանդիպումից հետո ԲՀԿ առաջնորդը նորից հայտարարությամբ հանդես եկավ՝ նշելով, որ հանրահավաքը չեղյալ է համարվում: Փետրվարի 23-ին խորհրդարանում ԱԺ ԲՀԿ խմբակցության քարտուղար Նաիրա Զոհրաբյանը հայտարարեց, որ իրենք բոյկոտում են ԱԺ քառօրյա նստաշրջանը: