ԲՀԿ-ից պատգամավորների՝ կուսակցությունից կամ խմբակցությունից դուրս գալը ԱԺ նախագահ Գալուստ Սահակյանը բնական է համարում՝ նշելով, որ դա պայմանավորված է ոչ թե ԲՀԿ-ի նկատմամբ ճնշումներով, այլ կուսակցության ղեկավարի հնարավոր փոփոխությամբ։
«Բոլորը նվիրյալներ են Գագիկ Ծառուկյանին, եւ այսօր, որովհետեւ խնդիր է առաջացել, որ, ըստ երեւույթին, համագումարում կուսակցության լիդերը կփոխվի, բնական է՝ որոշակի շարժեր պետք է լինեին»,- լրագրողների հետ զրույցում այսօր՝ մարտի 5-ին ասաց Գալուստ Սահակյանը։
Գալուստ Սահակյանը խուսափեց գնահատական տալ ԲՀԿ խմբակցության քարտուղար Նաիրա Զոհրաբյանի՝ կուսակցության ղեկավարի պարտականությունները ստանձնելու հնարավորությանը՝ նշելով, որ իր համար ավելի կարեւոր է, թե ինչ ռազմավարություն կընտրի կուսակցությունը եւ ինչ փոխհարաբերություններ կստեղծվեն կուսակցության հետ։
Նշենք, որ ՀՀԿ-ԲՀԿ խմորումներից հետո ԲՀԿ խմբակցությունը լքելու մասին հայտարարել են մեծամասնական ընտրակարգով ընտրված Մուշեղ Պետոյանը, Դավիթ Քոչարյանն ու Գրիգորի Մարգարյանը: Կուսակցությունից դուրս գալու մասին հայտարարել են պատգամավորներ Հարություն Ղարագյոզյանը, Արագած Ախոյանը, Կարո Կարապետյանը, Ռուստամ Գասպարյանը: Վարդան Օսկանյանը նույնպես կուսակցությունից եւ խմբակցությունից դուրս գալու դիմումներ է գրել։