Վազգեն Սարգսյանն ինչպես ռևերանսներ չէր անում, ձևեր չէր թափում կյանքում, նույնը գրականության մեջ էր: Այս մասին այսօր` մարտի 5-ին, լրագրողներին ասաց «Գարուն» ամսագրում Վազգեն Սարգսյանի հետ աշխատած դրամատուրգ Կարինե Խոդիկյանը:
«Նրա լավագույն ստեղծագործությունները, որոնք սովորական գյուղացու կյանքի, հոգսերի, երկրի խնդիրների ու ցավերի մասին էին, տպագրվել են «Գարուն» ամսագրում: Երբ նա խմբագրությունում էր լինում, աշխատանքը կաթվածահար էր լինում: Նա այնպիսի աշխուժություն էր իր հետ բերում, որ հենց մտնում էր ներս, բոլորս սկսում էինք նրանով տարվել: Իսկ երբ դուրս էր գալիս խմբագրությունից, դասավորած թղթերը մի հատ էլ խառնում, նոր գնում էր»,- հիշեց տիկին Խոդիկյանը:
Կարինե Խոդիկյանը պատմեց, որ երբ զորահավաք էր սկսվել և տղաներին անգամ փողոցից էին տանում պատերազմ, Վազգեն Սարգսյանն ասում էր, որ բոլորը փախչում են, չեն ուզում հայրենիքը պաշտպանել` առանց մտահոգվելու, թե իրենց փոխարեն այդ գործն ո՞վ պետք է անի. « Վազգեն Սարգսյանը մի օր ինձ ասաց, որ երբեք չէր կարող պատկերացնել` վարչապետի աշխատանքն այսքան դժվար է: Նա ասում էր՝ Կարինե, երբ պաշտպանության նախարար էի և ինչ-որ բան էր պետք լինում, միայն պահանջում էի, որ լուծեն դրանք: Իսկ հիմա վարչապետ եմ և բոլորն ինձանից են պահանջում: Ես սարսափում եմ գիշերից, քանի որ չեմ կարողանում գոնե մեկ կամ երկու ժամ առանց խնդիրների մասին մտածելու գլուխս բարձին դնել: Քնաբեր խմելով` փորձում եմ գոնե մեկ ժամ հանգստանալ և չմտածել մեր երկրի խնդիրների մասին»,-հիշեց Կարինե Խոդիկյանը:
Տիկին Կարինեն հիշեց նաեւ, թե ինչպես էր Վազգեն Սարգսյանն արձագանքել իր մահվան մասին տարածված ապատեղեկատվությանը. «90-ականներին լուր տարածվեց, որ Վազգենը մահացել է: Այն ժամանակ բջջային հեռախոս չկար, բայց նա մի մեծ ռադիոհեռախոս ուներ, զանգեցի, և ըստ երևույթին մի հազար հոգի արդեն զանգել էր, միանգամից ասաց. «Սաղ եմ, սաղ եմ, ձեզ ըտենց բախտ որտեղի՞ց»,-ասաց Խոդիկյանը:
ՀԳՄ նախագահ Էդվարդ Միլիտոնյանն էլ նշեց, որ Վազգեն Սարգսյանը և տաղանդավոր քաղաքական գործիչ էր, և տաղանդավոր գրող:
«Վազգենը փայլուն արձակագիր էր, այդ մասին է վկայում նրա «Հայի փորձությունը» ստեղծագործությունը: Նա պարզ թվացող մարդ էր, բայց նաև շատ բարդ խորք ուներ, որը պետք է ընդունվեր, բայց չընդունվեց: Փաստ է, որ նա բնավորությամբ եզակի մարդ էր, ով կարողացավ այդ դժվար պայմաններում բանակ ստեղծել: Հրաշալի հրամանատար էր, ով մարդկանց իրեն էր ենթարկեցնում կառուցիկ խստությամբ, այլ ոչ թե հրամաններ տալով»,-ասաց Միլիտոնյանը:
Նշենք, որ այսօր Վազգեն Սարգսյանը կդառնար 56 տարեկան։