Գիտնականները հանգել են եզրակացության, որ կենցաղային քիմիայի ապրանքները, որոնք արտադրողները որպես «էկոլոգիապես մաքուր» են ներկայացնում կամ նշում են կանաչ պիտակով՝ մատնանշելով վնասակար նյութերի բացակայությունը, իրականում թունավոր նյութեր են արտանետում:
Մասնագետներն ուսումնասիրել են «էկոլոգիապես մաքուր» պիտակով կենցաղային քիմիայի 37 ապրանքի քիմիական բաղադրությունը. օդի թարմացուցիչներ, լվացքի փոշի, մաքրող միջոցներ: Արդյունքները ցույց են տվել, որ իրականում դրանք 156 թռչող օրգանական միացություններ են պարունակում, որոնցից 42-ը թունավոր են մարդու համար: Յուրաքանչյուր միջոց առնվազն մեկ թունավոր հավելում է պարունակում:
Ըստ Gazeta-ի, գիտնականները նաեւ պարզել են, որ արտադրողներն ուսումնասիրված նմուշների պիտակների վրա դրանցում պարունակվող 550 թռչող միացություններից (օրգանական եւ ոչ օրգանական) ընդամենը 3%-ն են նշել:
Նրանք հայտարարում են, որ իրենց աշխատանքի արդյունքները նշանակալից են, քանի որ մարդիկ սեփական բնակարանում շնչում են թունավոր նյութերի մեծ մասը: Մասնագետները ծրագրում են շարունակել ուսումնասիրել քիմիական այն միջոցների բաղադրությունը, որոնց մարդիկ առնչվում են ամեն օր: