Ադրբեջանին զենքի 85%-ը Ռուսաստանն է վաճառում: Այս մասին մարտի 20-ին Երեւանում կայացած ԵՄ-Հայաստան միջխորհրդարանական համագործակցության հանձնաժողովի նիստի ժամանակ հայտարարեց ընդդիմադիր պատգամավոր, Հայաստանի ԱԳ նախկին նախարար Ալեքսանդր Արզումանյանը:
Նա մեջբերեց Խաղաղության հետազոտության Ստոքհոլմի միջազգային ինստիտուտի (SIPRI) զեկույցը ռազմական ծախսերի, այդ թվում՝ 2010-2014 թ.թ. Ադրբեջանի կողմից զենքի ներկրման մասին: Զեկույցի համաձայն, նախորդ քառամյակի համեմատ, Ադրբեջանը 3.5 անգամ ավելացրել է զենքի ձեռքբերումը:
Արզումանյանի խոսքով, մտահոգում է այն, որ, նույն զեկույցի համաձայն, զենքի 85%-ը ձեռք է բերվում Ռուսաստանից՝ ԵԱՀԿ Մինսկի խմբի համանախագահ երկրից: Որպես միջնորդ, այն պարտավոր է զերծ մնալ հակամարտող կողմերից որեւէ մեկին զենք մատակարարելուց: Ադրբեջանը վերջին մեկ տարվա ընթացքում կտրուկ սրել է իրավիճակը՝ ավելի հաճախակի խախտելով հրադադարի ռեժիմը: Իսկ գնդակոծությունների թիրախում, այդ թվում՝ ծանր զինտեխնիկայից, հաճախ քաղաքացիական օբյեկտներ են լինում:
«Այս քաղաքականությունը հանգեցրեց բոլոր երեք կողմերից աննախադեպ թվով զոհերի»,- հայտարարեց Արզումանյանը՝ նկատի ունենալով Արցախի Հանրապետությունը, Ադրբեջանն ու Հայաստանը:
Ցավոք, ըստ նրա, վերջին տարվա ընթացքում տեղի ունեցած իրադարձությունները մեծ հույսեր չեն ներշնչում: Ադրբեջանը շարունակում է խափանել խաղաղության բանակցությունները:
