Հայաստանի բնակիչներն անձրեւոտ եղանակի պատճառով չկարողացան մարտի 20-ին հետեւել արեւի խավարմանը: Պարզ եղանակի դեպքում այստեղ հնարավոր կլիներ միայն մասնակի խավարում տեսնել. Լուսինն արեւի սկավառակը կծածկեր միայն 25%-ով:
NEWS.am-ի թղթակցի հետ զրույցում Հայկական աստղագիտական ասոցիացիայի ղեկավար Արեգ Միքայելյանը պարզաբանեց, որ աստղադիտակով նման երեւույթի չեն հետեւում, քանի որ Արեգակը շատ վառ աստղ է, եւ նրա լույսն ուժեղացնել պետք չէ: Խավարմանը հետեւելու համար բավարար է նաեւ մուգ ապակին, սակայն անձրեւն ու ամպամած եղանակը Հայաստանի բնակիչներին խանգարեցին տեսնել այդ երեւույթը:
Մարտի 20-ին արեւի խավարմանը կարելի էր հետեւել Հյուսիսային կիսագնդում. խավարման մասնակի փուլը Երկրի մակերեւույթին սկսել է տեղի ունենալ ժամը 11:41-ից եւ ավարտվել է 15:50-ին: Ամբողջական փուլի շարժումը սկսվել է 13:09-ին, Գրենլանդիա կղզու հարեւանությամբ, եւ ավարտվել է 14:21-ին, Հյուսիսային բեւեռում:
Եվրոպայում խավարումը կազմել է 60-80%, աֆրիկյան Սահարա անապատում՝ 65%, իսկ Չինաստանում՝ ընդամենը 20%: