Բրիտանացի պատգամավոր Սայադ Քարիմը Ղարաբաղի հարցով տարածքային լուծումներ չի առաջարկել։ Այս մասին լրագրողներին մարտի 20-ին Երեւանում հայտարարեց Հայաստան-ԵՄ միջխորհրդարանական համագործակցության հանձնաժողովի համանախագահ, ԱԺ պատգամավոր Սամվել Ֆարմանյանը։

Նրա խոսքով՝ ԵՄ համանախագահ Սայադ Քարիմի խոսքը սխալ են հասկացել։ Նա ինքը անձամբ առաջարկություն չի հնչեցրել իր կողմից, այլ միայն մեջբերել է Թուրքիայի կառավարության դիրքորոշումը՝ խնդրելով նորից ներկայացնել Հայաստանի ղեկավարության տեսակետը։

Այս կապակցությամբ Քարիմը նշել է, որ ինքը երբեք  ուղղակիորեն դերակատարում չի ունեցել Հարավային Կովկասի հակամարտություններում, այդ պատճառով էլ նշանակվել է Հարավային Կովկասում ԵՄ միջխորհրդարանական համագործակցության հանձնաժողովի համանախագահ։ «Հայաստանը տարածաշրջանի առաջին երկիրն է, որը ես երբեւէ այցելել եմ եւ հեռանում եմ ձեր երկրից լավ տպավորություններով»,- ասել է բրիտանացի պատգամավորը։