Հայաստանի խորհրդարանը այն վայրը չէ, որտեղ թույլատրվում է թերուսների ներկայությունը: Այս մասին այսօր՝ մարտի 23-ին, ԱԺ-ում հայտարարել է ՀՀԿ խմբակցության պատգամավոր Սամվել Ֆարմանյանը՝ մեկնաբանելով «Ժառանգություն» խմբակցության պատգամավոր Զարուհի Փոստանջյանի՝ ՀՀ գլխավոր դատախազ Գեւորգ Կոստանյանին ուղղված մեղադրանքները:
Ֆարմանյանը հայտարարել է, որ Ռուսաստանի գլխավոր դատախազին կարելի է դիմում գրել, բայց անիմաստ է պատասխան պահանջելը՝ թաքնվելով հայ-ռուսական համաձայնագրերով: «Որպեսզի որեւէ մեկը հասկանա, թե ինչումն է տարբերությունը պատգամավոր Սամվել Ֆարմանյանի, պատգամավոր Պողոս Պողոսյանի, Զարուհի Փոստանջյանի եւ ՀՀ գլխավոր դատախազի միջեւ, անհրաժեշտ է նվազագույն իրավագիտական գիտելիքներ: Միջպետական համաձայնագրերով սահմանվում են այն լիազոր մարմինները, որոնք հանդես են գալիս պետության անունից: Տվյալ պարագայում ՀՀ գլխավոր դատախազը հանդես է գալիս ՀՀ անունից, իսկ դուք կամ մեր մյուս գործընկերները, որքան էլ ջանաք, չեք կարող հանդես գալ պետության անունից»,-ասել է Ֆարմանյանը:
Զարուհի Փոստանջյանն ի պատասխան նշել է. «Ինձնից աջ կողմ նստած են երկու երիտասարդ պատգամավորներ, որոնք փորձել են մի քանի անգամ անձնական վիրավորանքներ հասնել ինձ։ Անկախ նրանից, դուք քանի կուսակցություն եք փոխել եւ դեռ քանիսը նպատակ ունենք փոխել, միեւնույն է՝ չեք կարող կաշկանդել ինձ»,-ասաց Զարուհի Փոստանջյանն ու հավելել. «Այո, Կոստանյանը իր գործառույթները չի կատարել եւ չի էլ պատրաստվում կատարել, եւ դրա ապացույցն այն է, որ այդպես էլ չտեսանք այն նամակը, որը նա հղել էր ՌԴ դատախազին եւ դրա պատասխանը: Այդ մի քանի կուսակցություն փոխած անձինք կարիք չունեն նման անձի պաշտպանության»:
Հիշեցնենք, որ բանաձեւի նախագծում Փոստանջյանը կոչ է անում խորհրդարանին ռուսական կողմից պահանջել հայ իրավապահներին հանձնել Ավետիսյանների ընտանիքի 7 անդամների սպանության մեջ մեղադրվող Վալերի Պերմյակովին:
