Եվրասիական տնտեսական միությանն անդամակցելուց հետո Հայաստանի եւ Եվրամիության միջեւ անորոշ հարաբերությունների փուլը վստահորեն հաղթահարվել է։ Այս մասին մարտի 24-ին մամուլի ասուլիսի ժամանակ հայտարարել է «Եվրոպական ինտեգրացիա» ՀԿ ղեկավար փորձագետ Կարեն Բեքարյանը։
Նրա խոսքով՝ եվրոպական կառույցների կողմից (Եվրոպայի ժողովրդական կուսակցություն, Եվրախորհրդարան, «Եվրանեսթ» Խորհրդարանական վեհաժողով) վերջերս ընդունած բանաձեւերով եւ Հայաստան-ԵՄ Միջխորհրդարանական համագործակցության հանձնաժողովի ընդունած եզրափակիչ փաստաթղթով կողմերը հստակ պատրաստակամություն են հայտնում զարգացնել հարաբերությունները եւ ոչ մի դեպքում դրանք կախվածության մեջ չդնել ստեղծված իրավիճակից։
«Մայիսին Ռիգայում կկայանա ԵՄ «Արեւելյան գործընկերության» գագաթնաժողովը, եւ դրա նախօրեին կողմերի միջեւ ավարտվել է խորհրդակցությունների փուլը»,- նշել է Բեքարյանը։ Անդրադառնալով Ռիգայի գագաթնաժողովից սպասվող ակնկալիքներին՝ քաղաքագետը նշեց, որ Հայաստանի հետ համագործակցության համաձայնագրային իրավական հիմքերի ամրապնդման համար անհրաժեշտ է ԵՄ բանակցային թիմին մանդատ տրամադրել։ «Մեր բանակցային թիմից մենք սպասում ենք ընդլայնել Եվրամիության հետ համագործակցության շրջանակը»,- եզրափակել է Կարեն Բեքարյանը։