Ֆրանսիայում կործանված Airbus A320-ում գերմանացի 16 աշակերտ է եղել։ Այդ մասին հաղորդում է կատալոնական La Vanguardia պարբերականը։
Աշակերտների խմբին ուղեկցել է չորս ուսուցիչ, երեխաները Բարսելոն էին ժամանել փոխանակման ծրագրով սովորելու։ Նրանք Իսպանիայում 9 օր են անցկացրել, ապրել են իսպանացի ուսանողների եւ դասախոսների տներում։
Նրանք վերադառնում էին տուն՝ Դյուսելդորֆից 80 կլմ հեռավորության վրա գտնվող քաղաք։ Նշվում է, որ աշակերտները սովորում էին Յոզեֆ Քենիգի գիմնազիայում։
Ինքնաթիռում Գերմանիայի 67 քաղաքացի է եղել։
Germanwings բյուջետային ավիաընկերության Airbus A-320 ինքնաթիռը կործանվել էր Ֆրանսիական Ալպերի դժվարամատչելի տեղանքում։ Օդանավում եղել է 148 ուղեւոր եւ անձնակազմի 8 անդամ։ Ֆրանսիայի նախագահ Ֆրանսուա Օլանդը հայտարարել է, որ նրանք բոլորը, ամենայն հավանականությամբ, զոհվել են։