Ցեղասպանության մասին Հայաստանի առաջին նախագահ Լեւոն Տեր-Պետրոսյանի արած հայտարարությունը հակասում է Հայաստանի շահերին։ Այս մասին մարտի 24-ին խորհրդարանում հայտարարել է ԱԺ փոխխոսնակ Էդուարդ Շարմազանովը՝ մեկնաբանելով Տեր-Պետրոսյանի արած հայտարարությունը։
«Շատ տխուր է, երբ նման հայտարարություններ է անում մարդը, որը բարձր պաշտոններ է զբաղեցրել եւ եղել է հանրապետության նախագահը։
Իր այսօրվա հայտարարության մեջ Տեր-Պետրոսյանը գրել էր, որ Հայոց ցեղասպանության ճանաչման համար մղվող պայքարը միայն հայկական սփյուռքի խնդիրը պիտի լինի, թող ամեն մեկն իր ապրած երկրի հետ աշխատանքներ տանի։ Այսինքն՝ Հայաստանին չպիտի՞ վերաբերի այն փաստը, թե ճանաչում են Ցեղասպանությունը, թե ոչ։ Այսպե՞ս է նա մոտենում մեր արտաքին քաղաքականության կարեւորագույն հարցին։ Զարմանք է առաջացնում նաեւ Տեր-Պետրոսյանի կոչը՝ Ցեղասպանության հարցում Թուրքիայի վարած քաղաքականությունը արգելք չհամարել Անկարայի եվրաինտեգրման ճանապարհին։ Այսինքն ի՞նչ, մենք պետք է գնանք եւ թուրքերին ասենք՝ մի՛ ճանաչեք Հայոց ցեղասպանությունը։ Նման հայտարարությունը ոչ մի կերպ չի ծառայում մեր ազգի շահերին։
Նմանօրինակ հայտարարություններ չի կարելի անել անգամ քաղաքական թոշակառուի կյանքի հանդեպ ցավից։ Հարգելի՛ պարոն առաջին նախագահ, ես հասկանում եմ, որ նման կյանքը շատ դառն է ձեզ համար, սակայն ընդունենք ի գիտություն, որ պետական շահերին ծառայելը շատ կարեւոր է։ Իսկ այն, ինչ Դուք եք ասում, չի բխում մեր պետության շահերից»,- հայտարարել է Շարմազանովը։