Այսօր` հուլիսի 23-ին ԼՂՀ մայրաքաղաք Ստեփանակերտում նախատեսված էր անցկացնել հանրահավաք, որը պետք է կոչ ընդուներ` ուղղված միջազգային հանրությանը, ԼՂՀ-ն ճանաչելու պահանջով: Նման հանրահավաքի առիթ էր դարձել Հաագայի միջազգային դատարանի որոշումը, ըստ որի Կոսովոն միակողմանի անկախության հռչակելով Սերբիայից ոչ մի միջազգային օրենք չի խախտել:
Սակայն, ինչպես լրագրողների հետ հանդիպման ժամանակ ասաց ԼՂՀ խորհրդարանի արտաքին հարաբերությունների հանձնաժողովի նախագահ, «Ժողովրդավարություն» խմբակցության ղեկավար Վահրամ Աթանեսյանը, ԼՂՀ ԱԺ քաղաքական ուժերը նախընտրել են հանրահավաքի փոխարեն հանդես գալ համատեղ հայտարարությամբ: «Հանրահավաքը ԼՂՀ դիրքորոշումը բոլոր կառույցներին հասցնելու միջոց էր, սակայն քաղաքական ուժերը որոշեցին գնալ այլ ճանապարհով եւ հանդես գալ համատեղ հայտարարությամբ»,- ասել է Վահրամ Աթանեսյանը:
Ավելի վաղ NEWS.am-ի թղթակցի հետ զրույցում ԼՂՀ ԱԺ նախկին պատգամավոր Աշոտ Սարգսյանը նշել էր, որ Ղարաբաղի տարբեր շրջաններում երիտասարդական կազմակերպությունների մասնակցությամբ մարդիկ դուրս են գալիս փողոց եւ արտահայտում իրենց դրական դիրքորոշումը կապված Հաագայի միջազգային դատարանի որոշման հետ: Մարտունիում կեսօրին հանրահավաք արդեն տեղի է ունեցել:
Հիշեցնենք, որ Հաագայում գտնվող ՄԱԿ-ի Արդարադատության միջազգային դատարանի հուլիսի 22–ի վճռում ասվում է, որ Կոսովոյի՝ Սերբիայից անջատվելով եւ միակողմանիորեն անկախ հռչակվելով՝ որեւէ միջազգային օրենք չի խախտել: Մինչ օրս Կոսովոյի անկախությունը ճանաչել է ավելի քան վեց տասնյակ երկիր, այդ թվում ԱՄՆ-ն ու Եվրամիության 27 անդամ երկրներից 22-ը: