Եվրամիությունը շարունակում է աջակցել Հայաստանի եւ Թուրքիայի հարաբերությունների կարգավորման գործընթացին եւ երկու կողմին էլ խրախուսում է առանց նախապայմանների երկխոսություն սկսել: Այս մասին մարտի 25-ին կայացած մամուլի ասուլիսում հայտարարեց Հայաստանում Եվրամիության պատվիրակության ղեկավար, դեսպան Տրայան Հրիսթեան:
Նրա խոսքով, ԵՄ-ն նաեւ ֆինանսական աջակցություն է տրամադրում՝ փորձելով խթանել այն նպատակին հասնելու գործընթացը: «Մենք 2 մլն եվրոյի շարունակական ծրագիր ունենք, որը նպաստում է մարդկանց շփումների միջոցով կողմերի միջեւ վստահություն հաստատելուն՝ նպաստելով մշակութային եւ կրթական գործունեությանը, ինչպես նաեւ երկու հասարակությունների մասին հավասարակշռված տեղեկատվության տարածմանը»,- նշեց Տրայան Հրիսթեան:
Ըստ դեսպանի, ԵՄ-ն հավատում է, որ ողբերգության զոհերի հիշատակին նվիրված միջոցառումները հայ-թուրքական հարաբերությունների բարելավման եւ «այդ հարաբերությունների զգայուն ասպեկտների հաղթահարման» լավագույն առիթը կդառնան:
«Կցանկանայի նաեւ հավելել, որ հստակ քաղաքական կամք է անհրաժեշտ՝ անցյալի հետ հաշտեցման եւ ձեր ընդհանուր պատմության այդ ողբերգական դրվագը համատեղ քննարկելու համար, ինչը, իհարկե, կնպաստի երկկողմ հարաբերությունների կարգավորմանը»,- ամփոփեց Հրիսթեան:
