Ֆրանսիական Ալպերում մարտի 24-ին կործանված Germanwings ընկերության օդանավն անկում է ապրել թռիչքի ամենաանվտանգ փուլում: Այս մասին ասված է Associated Press գործակալության վերլուծաբան Սքոթ Մեյերովիցի հոդվածում:
Ինքնաթիռի հետ կատարվածի գաղտնիքի բացահայտման առաջին բանալին հենց բեկորները կտան: Եթե դրանք բավական կոմպակտ են ընկել, նշանակում է՝ ինքնաթիռն ամբողջությամբ լեռներին է բախվել: Իսկ եթե բեկորները տարածված են, նշանակում է՝ օդանավը, հավանաբար, մասերի է բաժանվել օդում:
Վերլուծաբանը նշում է, որ Բարսելոնից Դյուսելդորֆ է ուղեւորվել Airbus A320 ինքնաթիռը՝ ժամանակակից ավիացիայի աշխատավոր ձիուկը: Ամբողջ աշխարհում ավելի քան 3600 նման օդանավեր են թռչում:
A320-ի ընտանիքն անվտանգության լավ ցուցանիշներ ունի: Հենց այս օդանավն է 1991 թվականին մատակարարվել Lufthansa-ին (Germanwings-ի մայր ձեռնարկությունը) եւ 46.700 չվերթների արդյունքում շուրջ 58.300 ժամ թռիչք իրականացրել:
Մեյերովիցը մի քանի վարկած է ներկայացնում, թե ինչ կարող էր տեղի ունենալ ինքնաթիռի հետ: Նախ՝ արագ դեկոմպրեսիա: Ինքնաթիռը 24 տարվա ընթացքում օրական ավելի քան 5.3 թռիչք է իրականացրել: Եվրոպայում կարճատեւ թռիչքներ իրականացնող ինքնաթիռի համար դա անսովոր է, սակայն, ամեն դեպքում, նորմայի սահմաններում: «Եթե ինչ-ինչ պատճառներով արագ դեկոմպրեսիայի ինչ-որ տեսակ է տեղի ունեցել, ապա առաջին բանը, որ պետք է անեին օդաչուները, ինքնաթիռը 10.000 ոտնաչափից ներքեւ իջեցնելն էր, որպեսզի շնչելու հնարավորություն լիներ»,- գրում է վերլուծաբանը:
Մյուս վարկածը վերաբերում է տեխնիկական սխալին: Airbus-ի խցիկն ամենալավ մտածվածներից է, սակայն թերություններ պատահում են: Օրինակ, բոլորովին վերջերս Lufthansa-ի A321-ը մեկ րոպեի ընթացքում շուրջ 4.000 ոտնաչափ ներքեւ իջավ, երբ օդաչուն անսպասելիորեն իջեցրեց ինքնաթիռի քիթը: Նոյեմբերյան միջադեպից հետո Ավիացիոն անվտանգության եվրոպական գործակալությունն օդաչուներին նախազգուշացրեց ցուցիչների տեղեկությունների հնարավոր սխալի մասին:
Եվս մեկ վարկած էլ ահաբեկչությունն է: Հեղինակը նշում է, որ հանցավոր գործունեության հետ ավիաաղետի որեւէ կապի նախանշան չկա, սակայն նման գործողությունները բացառել առայժմ չի կարելի:
Վերջապես, գոյություն ունի նաեւ օդաչուների սխալի վարկածը: Օդաչուները կարող էին պատահաբար ինքնաթիռը հասցնել բարձրության գագաթնակետին կամ իջեցման ռեժիմի եւ չկարողանալ կառավարել այն: Հնարավոր է նաեւ, որ օդաչուներն այնքան կենտրոնացած են եղել ինքնաթիռի բարձրությունը 10.000 ոտնաչափից ներքեւ իջեցնելու ուղղությամբ, որ լեռներին չափազանց մոտենալու հանգամանքը գիտակցել են, երբ արդեն շատ ուշ է եղել:
