Ստեփանակերտը ողջունում է ՄԱԿ-ի Միջազգային դատարանի որոշումը, որը ճանաչել է Կոսովոյի անկախությունը: «Եթե Կոսովոյի անկախության ճանաչումը Հաագայի դատարանի կողմից նպաստի ԼՂՀ միջազգային ճանաչմանը, ապա մենք միայն կողջունենք այդ որոշումը»,- հայտարարել է ԼՂՀ նախագահ Բակո Սահակյանը հուլիսի 23-ին լրագրողների հետ հանդիպման ժամանակ:
Նրա խոսքով, ՄԱԿ-ի դատարանի վճիռը կարեւորագույն իրադարձություն է: «Սակայն չնայած դրան՝ մենք կշարունակենք ԼՂՀ միջազգային ճանաչմանն ուղղված մեր աշխատանքները։ Նոր քաղաքական իրավիճակ է ստեղծվել, եւ համաձայն դրա՝ մեր կյանքում նոր զարացումներ տեղի կունենան»,- ասել է Բակո Սահակյանը:
Նա նշել է, որ միաժամանակ անհրաժեշտ է հավասարակշռված դիրքորոշում հանդես բերել Հաագայի դատարանի այդ վճռին: «ԼՂՀ-ն ու Հայաստանը պետք է հանդես գան նույն դիրքորոշմամբ»,- հայտարարել է ԼՂՀ նախագահը: Հաղորդում է NEWS.am-ի թղթակիցը Ստեփանակերտից:
Հիշեցնենք, որ Հաագայում գտնվող ՄԱԿ-ի Արդարադատության միջազգային դատարանի հուլիսի 22–ի վճռում ասվում է, որ Կոսովոյի՝ Սերբիայից անջատվելով եւ միակողմանիորեն անկախ հռչակվելով՝ որեւէ միջազգային օրենք չի խախտել: Մինչ օրս Կոսովոյի անկախությունը ճանաչել է ավելի քան վեց տասնյակ երկիր, այդ թվում ԱՄՆ-ն ու Եվրամիության 27 անդամ երկրներից 22-ը:
