Լիտվայի Սեյմի՝ Արտաքին քաղաքական հարցերով խորհրդարանական հանձնաժողովի նախագահ Բենեդիկտաս Յուոդկան ընկել է ադրբեջանական լրատվամիջոցների լարած թակարդը։
Լիտվացի պատգամավորը haqqin.az-ին տված հարցազրույցում Հայաստանին եւ Ադրբեջանին կոչ էր արել Ղարաբաղի հիմնախնդրի այնպիսի լուծում գտնել, որը ընդունելի կլիներ երկու կողմերի համար։ Այս հայտարարությունը ադրբեջանական մամուլը մեկնաբանել էր որպես «Ադրբեջանին հայտնած աջակցություն»։
«Ես վստահորեն կարող եմ ասել, որ Լիտվան միշտ հարգել է միջազգային իրավունքի հիմնարար սկզբունքը՝ պետությունների տարածքային ամբողջականությունը։ Այդ դիրքորոշումն անփոփոխ է մնում։ Մենք հարգում ենք մեր հարեւանների սահմաններն ու ինքնիշխանությունը։ Որպես ԵՄ անդամ պետություն՝ մենք լիովին աջակցում ենք Մինսկի խմբի հետ համագործակցելու ԵՄ ջանքերին, որի նպատակն է միջազգային իրավունքի հիմնարար սկզբունքներով եւ նորմերով հասնել ղարաբաղյան հակամարտության խաղաղ կարգավորմանը։ Ես անկեղծ հույս եմ հայտնում, որ Ադրբեջանն ու Հայաստանը կկարողանան երկու կողմի համար ընդունելի լուծում գտնել»,- մեջբերում է պարբերականը պատգամավորի խոսքը։
Հայտարարության մեջ «Ադրբեջանին աջակցելու» մասին ոչ մի խոսք չի գնում։
Ինչ վերաբերում է Ադրբեջանի տարածքային ամբողջականությանը, ապա Լեռնային Ղարաբաղը երբեք Ադրբեջանական Հանրապետության կազմում չի եղել։