Գյումրիում մարտի 26-ի գիշերը դանակահարված երիտասարդը գտնվում է անգիտակից վիճակում: Այս մասին NEWS.am-ի թղթակցին հայտնեցին «Գյումրիի» հիվանդանոցից:
Նա գտնվում է Վերակենդանացման բաժանմունքում, վիճակը ծանր կայուն է: Կրծքավանդակի շրջանում վնասվածքներ ստացած երիտասարդին վիրահատել են: Հիվանդանոցից հայտնեցին, որ երիտասարդի մոտ առկա է կրծքավանդակի ձախ կեսի առաջային մակերեսի ծակած-կտրած թափանցող վերք, սրտապարկի վնասումով,տրավմատիկ շոկ, աջ ակնակապիճի արյուազեղում, փափուկ հյուսվածքների սալջարդ:
Մեր տեղեկություններով՝ առայժմ հայտնի չէ՝ ով է երիտասարդին դանակահարել, դեպքը եղել է Այգաբաց համայնքում: Ասում են՝ ինչ-որ վիճաբանություն է եղել, ընկերները երիտասարդին տուն են տեղափոխել, այնուհետեւ դիմել են նրա մորը, ով«Շտապօգնության» աշխատակից է, եւ այդ օրը հերթափոխի է: Կինը, տեսնելով որդու վիճակը, անմիջապես նրան տեղափոխել է Գյումրիի հիվանդանոց:
Ավելի վաղ հայտնել էինք, որ Գյումրիում մարտի 26-ի գիշերը դանակահարություն է եղել: NEWS.am-ի թղթակցին ոստիկանության լրատվական ծառայությունից հաստատել էին, որ մարտի 26-ին` ժամը 04:45 -ի սահմաներում, մարմնական վնասվածքներով «Գյումրի» ԲԿ է տեղափոխվել 1988 թ. ծնված Ս. Ե.-ն: Դեպքը եղել է Գյումրիի գերեզմանոցի տարածքում, տուժածի առողջական վիճակը գնահատվում է ծանր կայուն: Կատարվում է քննություն, հանգամանքները պարզվում են:
