Նոյեմբերի 5-ի գործով դատավարության առաջին նիստի օրը դատարանի բակում ոստիկանների ուղղությամբ կրակելու եւ մի քանի ոստիկանի վիրավորելու մեջ մեղադրվող Հայկ Կյուրեղյանի գործով դատական նիստին այսօր՝ մարտի 27-ին, Երեւանի Կենտրոն եւ Նոփրք Մարաշ վարչական շրջանների դատարանում գործով վկաները հակասական ցուցմունքներ տվեցին:
Գործով վկա Արտակ Օհանյանը դատարանում հայտարարեց, որ Հայկ Կյուրեղյանը մեքենայի վրա բարձրանալով բացականչել է. «Այստեղ մի հատ ոստիկան չկա՞, մոտիկ գա կրակեմ»: Վկան նաեւ նշեց, որ Հայկ Կյուրեղյանը սեռական բնույթի հայհոյանքներ էր տալիս, այնինչ մյուս վկաները հակառակն էին պնդում:
Տուժող ոստիկան Սամսոն Ղարիբյանը դատարանում վկայություն տվեց, որ Հայկ Կյուրեղյանը կրակոցներ էր արձակում միայն ոստիկանների վրա եւ միայն նրանց վիրավորելու նպատակ ուներ:
«Ինքը սպիտակ մեքենայի վրա էր կանգնած, բղավում էր՝ չմոտենաք, կկրակեմ, մյուս ձեռքում էլ ինչ-որ սեւ բան էր, ասում էր՝ կպայթեցնեմ: Ինքը ուզում էր խանգարել դատական նիստը եւ բացահայտ արհամարհական վերաբերմունք էր դրսեւորում մեր պետության եւ հասարակության նկատմամբ: Ինքը միայն դիպուկ կրակում էր ոստիկանների ուղղությամբ, հավաքված քաղաքացիներին ու լրագրողներին չէր կրակում, այսինքն կոնկրետ իշխանության ներկայացուցիչներին էր ցանկանում վնասել»,-ասաց տուժողը՝ նշելով, որ ինքը վնասվածք է ստացել ձախ ուսի եւ ճակատի մոտ, դեպքից հետո էլ տեղափոխվել է հիվանդանոց, որտեղ բուժօգնություն է ստացել:
Այսօր նաեւ դատարանում վկայություն տվեցին գործով վկա ոստիկաններ Գեւորգ Սալմանյանը, Դավիթ Չիբուխչյանը, Արմեն Շահբազյանը նաեւ գործով վկա դատական կարգադրիչներ Սամվել Թադեւոսյանը, Գոռ Դանիելյանը:
Նշենք, որ դատական նիստին չէր մասնակցում Հայկ Կյուրեղյանը, որի նկատմամբ դատարանի նկատմամբ անհարգալից վերաբերմունքի պատճառով 10 ժամով նիստերին մասնակցելու իրավունքից զրկելու սանկցիա էր կիրառվել: Դատարանում ներկա էր նաեւ Հայկ Կյուրեղյանի պաշտպանը՝ Անժելա Հոբոսյանը, որը, սակայն, հարցեր չէր տալիս վկաներին, քանի որ ամբաստանյալի կողմից լիազորված չէր:
Դատական նիստն այսօր հետաձգվեց, հաջորդ դատական նիստը կկայանա ապրիլի 17-ին:
Հիշեցնենք, որ 2014թ. հունիսի 12-ին մեկնարկող Շանթ Հարությունյանի գործով դատական նիստից րոպեներ առաջ արտակարգ դեպք էր տեղի ունեցել դատարանի բակում։ 31-ամյա Հայկ Կյուրեղյանը կանգնել էր մեքենայի վրա՝ օդամղիչ ատրճանակը ձեռքին, եւ կրակել ոստիկանների վրա՝ վիրավորելով մի քանի ոստիկանի։ Ոստիկաններին նրան վնասազերծել եւ տարել էին ոստիկանություն։ Կյուրեղյանի նկատմամբ մեղադրանք է առաջադրվել ՀՀ քրեական օրենսգրքի 258 հոդվածի 4-րդ մասի՝ «խուլիգանություն զենքի կամ որպես զենք օգտագործվող առարկայի գործադրմամբ» և 316-րդ հոդվածի 4-րդ մասի ՝ «իշխանության ներկայացուցչի նկատմամբ բռնություն գործադրելը» հատկանիշներով:
