Ռուսաստանի ընդդիմախոսները շատ կցանկանային Հայաստանում պետական հեղաշրջում տեսնել, բայց դա տեղի չունեցավ: Հայաստանի Ազգային ժողովի արտաքին կապերի հանձնաժողովի հետ համատեղ նիստում այս մասին հայտարարել է ՌԴ Պետդումայի ԱՊՀ հարցերի հանձնաժողովի նախագահ Լեոնիդ Սլուցկին:
«1915 թվականի սարսափելի եւ տխուր իրադարձությունների 100-րդ տարելիցի հիշատակմանն ընդառաջ՝ մեր «ռազմավարական ընկերները», ինչպես ես նրանց կոչում եմ, իսկ իրականում՝ մեր ռազմավարական ընդդիմախոսները, շատ կցանկանային այստեղ պետական հեղաշրջում իրականացնել: Սակայն տիկին Վիկտորիա Նուլանդի (ԱՄՆ պետքարտուղարի օգնական - խմբ.) ժամանումից առաջ հեղաշրջում տեղի չունեցավ: Ես ողջունում եմ Գագիկ Ծառուկյանի քաջությունը, որը հանուն իր ժողովրդի միակ ճիշտ որոշումը կայացրեց»,- հայտարարել է Սլուցկին:
Հիշեցնենք, որ փետրվարի 17-ին «Բարգավաճ Հայաստան» կուսակցության այն ժամանակվա ղեկավար Գագիկ Ծառուկյանը չեղյալ էր հայտարարել փետրվարի 20-ին Երեւանում նախանշված համազգային հանրահավաքը: Մարտի 5-ին նա հայտարարեց կուսակցության առաջնորդի պաշտոնից հրաժարվելու մասին:
Նկատենք, որ սա այն հազվագյուտ դեպքերից է, երբ այլ երկրի քաղաքական գործիչն ուղղակիորեն մեկնաբանում է ուրիշ պետության ներքին քաղաքականությունը: Մի շարք հայ պատգամավորների՝ ՌԴ նախագահ Վլադիմիր Պուտինի ներքին քաղաքանակության շուրջ մեկնաբանությունների փորձերը իշխող մեծամասնության կողմից կանխվել են:
