2020թ. Հայաստանին անհրաժեշտ կլինի լրացուցիչ 500 մեգավատ հզորություն։ Այս մասին այսօր՝ մարտի 31-ին, լրագրողներին հայտնեց Հայաստանի հարցով Համաշխարհային բանկի տնօրեն Լորա Բեյլին՝ ներկայացնելով բանկի գնահատականները։
Ըստ նրա՝ լրացուցիչ պահանջարկը կբավարարի հատկապես գազով աշխատող նոր ՋԷԿ-ը։ «Մենք կօգնենք ՀՀ Կառավարությանը կազմել դրա տեխնիկական գնահատականը, ինչը նշանակում է, կօգնենք կողմնորոշվել որոշում կայացնելիս»,- հավելեց նա։
Հիշեցնենք, որ այս պահին Հայաստանում էլեկտրաէներգիայի գեներացման սահմանված հզորությունը 4200 մեգավատ է, որոնցից օպերացիոն է 55 տոկոսը։ Այսօր ՀԲ-ն «էլեկտրահաղորդման ցանցի բարելավում» նախագծի շրջանակում հավանություն է տվել Հայաստանին 52 մլն դոլար վարկ տրամադրելու ծրագրին։ Վարկի մեծ մասը ուղղվելու է Երեւան ՋԷԿ-ը սպասարկող ենթակայանների կապիտալ վերանորոգման աշխատանքներին, որը արտադրում է երկրի էլեկտրաէներգիայի 20 տոկոսը։
Հարցին, թե կարո՞ղ է արդյոք նոր ենթակայանը սպասարկել նաեւ նոր կայանը (Կառավարությունը պատրաստվում է այն կառուցել որպես Երեւան ՋԷԿ-ի 2-րդ էներգաբլոկ), ՀԲ նախագծի ղեկավար Արթուր Կոչնակյանը նշեց, որ նման հնարավորության մասին դատել կարելի է տեխնիկական գնահատական կազմելուց հետո։
«Ամեն դեպքում, վերանորոգման աշխատանքներից հետո ենթակայանի հաղորդիչ հնարավորությունները կմեծանան»,- ասաց նա։
